Lo 44n congrès del Front de Liberacion Nacionala Canac e Socialista (FLNKS) exigís que se tenga de convèrsas “dins un format bilateral” amb l’estat francés, dins las qualas s’establisca una data per “l’accès a la plena sobeiranetat” per Canaquia aqueste mes setembre de 2025 al pus tard. Aquel acòrdi entre França e Canaquia deuriá inclure un programa de transicion per la naissença del novèl estat, susvelhada per las Nacions Unidas.

Una delegacion de l’FLNKS se reünirà al començament d’aqueste mes de febrièr amb lo ministre francés d’otramar, Manuel Valls, per li far passar la demanda. Valls a dich qu’en aquela reünion, las convèrsas sul futur institucional de Canaquia se reprendrián. Pasmens, lo ministre se reünirà pas solament amb lo FLNKS, mas amb de delegacions independentistas e unionistas a l’encòp. La tòca, çò ditz Valls, es d’arribar a un acòrdi acceptable per totas las parts sus l’avenir de l’archipèla.

Valls a tanben criticat las “operacions d’interferéncia e de destabilizacion” d’Azerbaitjan dins los territòris d’otramar de la Republica Francesa. Dempuèi d'annadas, Bakó promòu la creacion d'un ret d'organizacions d'aqueles territòris per los sosténer dins lors demandas d'independéncia. La setmana passada, de representants de qualques unes d’aqueles movements s’amassèron en Canaquia per bastir lo Front Internacional de Descolonizacion.

L’FLNKS a minimizat l’implicacion azèri dins l’iniciativa: ditz que las fòrças independentistas ensajan de profechar de las escasenças a lor disposicion per parlar de descolonizacion e que, en tèrmes de relacions internacionalas, i a agut fòrça actors dempuèi qualques decennis.

Azerbaitjan e França son en desacòrdi dempuèi longtemps a causa del sosten diplomatic de París a Armenia e la critica de las violacions dels dreches umans comesas per las tropas azèris dins lo Naut Karabakh.

Aquesta nòva es adaptada de Nationalia amb qui Jornalet ten un acòrdi de cooperacion.