A Buenos Aires, una marcha multitudinària desfilèt dempuèi la Plaça del Congrès fins a la Plaça de Mai, ont se tròba l’Ostal de Govèrn. Amb de bandièras multicoloras, d’afichas e de lèmas coma “armari e croton jamai pus” o “resisténcia trans”, la manifestacion foguèt convocada per de movements feministas e collectius LGBTQI+.

La causa d’aquela mobilizacion foguèt lo discors de Milei al Forum Economic de Davos lo 23 de genièr ont afirmèt que l’ideologia woke es un dels “càncers de la societat actuala” coma tanben o es lo “feminisme radical” actual  en afirmant que cercava de “privilègis”. En mai d’aquò,critiquèt la nocion de “feminicidi” en pretendent que va contra l’egalitat entre òmes e femnas d’aver de penas diferentas sonque pel sèxe de la victima. Tanben ataquèt l’”ideologia de genre” en assolidant que la lei establís l’egalitat entre òmes e femnas. L’endeman, lo ministre de la justícia, Mariano Cúneo Libarona, anoncièt la volontat del govèrn de suprimir lo feminicidi del còdi penal, d’eliminar los documents d’identitat non binaris e la “quòta trans” dins l’administracion publica.

Aquelas declaracions generèron una fòrta indignacion dins la societat civila, especialament dins los sectors mai progressistas.

Segon la sociològa e militanta feminista Luci Cavallero, Milei “passèt un lindal” amb son discors, catalizant un malèsser ja present dins fòrça mitans. A la manifestacion participèron de sindicats coma l’ATE e la CGT, e de politicians de l’oposicion, çò que menèt lo govèrn a qualificar la protèsta de “politica”.

Dins un contèxt electoral amb d’eleccions legislativas en octòbre, l’analista politic Gustavo Marangoni prevei que Milei contunharà sa estrategia de polarizacion per consolidar sa basa electorala e melhorar sa posicion dins lo Congrès.

Amb la mobilizacion e las reaccions que suscitèt, los manifestants considèran que Milei “se deuriá pentir” de sas paraulas, mas l’actitud del president suggerís que preferís de contunhar de “jogar fòrt permanentament”.

Las declaracions de Milei a Davos

Dins son discors, Milei pretendèt que l’ideologia woke seriá una malautiá de sonhar, coma una ideologia que menariá los païses a la malescasuda en destinant de grandas quantitats de ressorsas qu’aurián sonque per finalitat d’agrandir l’estat, de contrarotlar la vida dels ciutadans e de los empaurir amb d’impòstes.

Sul feminisme, lo president argentin declarèt qu’aviá pas de sens, pr’amor qu’a l’ora d’ara l’egalitat de genre seriá ja assegurada per las leis. Fin finala, assolidèt que lo feminisme actual cercariá la division de la societat en la polarizant en foncion del genre.

Segon de jornalistas argentins, aquela estrategia politica contunharà long del mandat presidencial.

Thousands marched in Argentina for #LGBTQI+ rights and against hate speech 🏳️‍🌈🏳️‍⚧️

The Federal Pride March took the streets, demanding equality and respect ✊

The message was clear: our rights are non-negotiable.

pic.twitter.com/yimFWcX3r3

— Erika Guevara Rosas (@ErikaGuevaraR) February 3, 2025