Lo novèl president dels Estats Units anoncièt que desirava de negociar un “acòrdi” amb Kyiv per qu’Ucraïna ofriguèsse una “garentida” sus sas tèrras raras en escambi de l’ajuda americana, çò rapòrta Fanpage. De son costat, lo president ucraïnés, Volodimir Zelenski, exprimiguèt sa disponibilitat per de negociacions de patz qu’impliquèsson Ucraïna, Russia, los Estats Units e l’Union Europèa.

Après aver temporàriament considerat de modificar las taxas impausadas a Mexic e Canadà e anonciat de negociacions possiblas amb China, Donald Trump tornèt dirigir son atencion cap als enjòcs geopolitics. “Cercam de trobar un acòrdi amb Ucraïna, segon lo qual metrián en garentida lors tèrras raras e d’autras ressorsas en escambi de l’ajuda que lor ofrissèm”, çò declarèt Trump dempuèi lo burèu oval de l’Ostal Blanc.

Lo magnat de l’immobilièr signèt tanben un decret executiu que nomenava Keith Kellogg enviat especial de son administracion per Kyiv, amb la tòca de metre endavant los “progrèsses amb Russia e Ucraïna”. “Devèm arrestar aquela guèrra ridicula”, çò concluguèt Trump.

De son caire, Zelenski exprimiguèt sa dobertura a de negociacions de patz, soslinhant la necessitat d’un dialòg amb Moscòu après sos recents escambis amb lo president estatsunidenc. Las reaccions dels dirigents europèus son partejadas: d’unes cridan a una responsa militara mai ferma, mentre que d’autres privilègian un apròchi diplomatic.

D’autre caire, Vladimir Putin exprimiguèt son admiracion per Trump pendent una entrevista a la television russa. Lo president rus afirmèt que Trump restabliriá lèu l’òrdre demest los actors europèus, que, segon el, finiràn que s’alinharàn sens resisténcia. “Trump, amb son caractèr e sa determinacion, restablirà l’òrdre fòrça rapidament. Lèu, totòm s’inclinarà e lo seguirà sens esitacion”, çò declarèt davant lo jornalista Pavel Zarubin.