Lo 14 de març de 2024, pendent la primièra estapa de la Korrika, la corsa basca per la lenga, 36 personas traversèron lo flume Bidasoa d’Irun fins a Hendaia —ont se tròba la frontièra entre los estats espanhòl e francés— dins l’encastre d’una accion de solidaritat amb migrants. Qualques jorns apuèi, divèrsas entitats politicas e socialas revendiquèron l’accion per denonciar las politicas migratòrias europèas.

En seguida d’aqueles faches, lo ministèri public francés acusa sèt activistas de far part d’un grop organizat e d’aver ajudat de migrants a intrar illegalament dins l’estat. Lo jutjament, previst pel 28 de genièr a la cort de Baiona, s’es remandat al 7 d’octòbre perque lo jutge a acceptat d’objeccions presentadas per la defensa e que cal mandar a la Cort Europèa dels Dreches Umans.

Mentretant, la campanha solidària «Acusi» (nom inspirat de la famosa letra dobèrta J’accuse de l’escrivan francés Émile Zola) a amassat mai de 3500 autoinculpacions en sosten als sèt activistas, çò rapòrta Directa. En mai d’aquò, lo 26 de genièr, environ 2500 personas manifestèron entre Irun e Hendaia per denonciar la criminalizacion de la solidaritat e remembrar lo nombre naut de victimas que son mòrtas en ensajant de traversar Bidasoa, çò rapòrta Naiz.