Actualitats
Perlongan la detencion provisòria de Louna, una femna en isolament dins una preson d’òmes
Detenguda per las protèstas contra l’A69, sa detencion relança los debats suls dreches de las personas transes dins lo sistèma penitenciari francés
Tèxte legit
Louna es una femna de 26 ans que se tròba en detencion provisòria, dempuèi octòbre de 2024, isolada dins la preson d’òmes de Tarba per las protèstas contra l’A69. La justícia a decidit de perlongar la detencion provisòria de Louna fins al 15 de junh que ven. Sa situacion chepica los activistas e defensors dels dreches umans.
Louna es acusada d'aver participat a la destruccion d'una palejadoira mejançant d’explosius e de far partida d'una associacion criminala, dins l’encastre de las protèstas contra las òbras de l’autoestrada A69 entre Tolosa e Castras. Los faches aguèron luòc en mai de 2024.
Lo 3 de febrièr passat, Louna compareguèt davant un jutge de las libertats e detencions (JLD) al tribunal de Tolosa, çò rapòrta Libération. Malgrat lo recampament de sosten que se tenia davant lo palais de justícia, la detencion foguèt estenduda per quatre meses de mai.
Lo collectiu de sosten a Louna a exprimit son inquietud per divèrsas rasons. D’un caire, Louna es detenguda dins una preson per òmes, malgrat que siá una femna trans. A mai, se tròba en isolament, una mesura d'a fons discriminatòria. Son avocata, Claire Dujardin, a denonciat aquela situacion coma una mena de maltractament.
Lo collectiu de sosten contunha d'organizar d'accions de solidaritat e demanda la liberacion de Louna. Exigisson tanben que se respècte son identitat de genre e que recépia un tractament adeqüat pendent sa detencion.
L’afar de Louna a redobèrt lo debat suls dreches de las personas trans dins lo sistèma penitenciari francés e lo besonh de protocòls adaptats per lors proteccion e respècte.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Sostien ad era!
Los drets de las personas trans que son drets umans.
Que i aja bonas rasons de l'empresoar o pas, la plaça d'ua hemna trans n'ei pas dens ua preson per òmis!
(la preson preventiva qu'ei un aute debat, be'm sembla que contravien aus drets umans tanben atau com ei practicada en França mes ne soi pas hèra assabentat, si quauqu'un ne sap mei que jo, que m'interessa)
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari