L'edicion 2024 de la Passem qu'estó ua immensa escaduda, tant suu plan popular com hestiu, mes tanben gràcias a la soa capacitat a lhevar hons entà la lenga occitana. Segon La République des Pyrénées, aquera darrèra edicion que permetó de recoltar 100 000 èuros qui seràn utilizats entà finançar 25 projèctes qui cèrcan de promòver e difusar l’occitan per divèrs mejans.

Desempuish la soa creacion en 2018 per l'associacion Ligams, la Passem qu'a considerablament evoluit. Aquera corsa de relèus, qui a per mira de promòver lo gascon, qu'a vist lo son trajècte s'alongar, passant de 400 km a las soas debutas a 1100 km en 2024, traversant atau 300 comunas, contra solament 100 de la purmèra edicion.

L'edicion 2024 que’s debanè en mai sus 6 dias e 5 nueits, en implicant centenas de corredors e 90 animacions diferentas. Lo trajècte que traversè Bigòrra, Comenge, Gers, Bearn, lo Baish Ador e las Lanas, en permetent atau ua immersion de las bonas dens los territòris de Gasconha.

Au delà de la quita corsa, un deus objectius essenciaus de la Passem que demora la collècta de hons. En tres edicions, qu'estón recoltats 215 000 èuros qu’an profieitat a 46 projèctes diferents, gràcias a la crompa de quilomètres peus participants. Aqueths hons que sostienen iniciativas culturaus, educativas, atau com projèctes ligats a la toponimia, l'edicion o la creacion de ressorsas pedagogicas entà l'occitan.

Que podetz consultar los projèctes finançats aquiu.