En quart de Copa, lo dèrbi Carcassona-Limós a Domèc tenguèt sas promessas al nivèl de l’engatjament de las formacions. Lo mesclanha limosenc Dall’Asta marcava tre la primièra minuta. Lo talonaire canari Alberola respondrà per un ensag personal aprèp despart al ras del tengut. A la pausa, mercé a un tombat del dobertura Herrero, Carcassona mena 7-6.

Limós marca sus sa primièra cadena a la represa. Una ataca bèla dels locals manda l’arrièr Escarré en Tèrra Promesa. Jo Drodrolagi punta l’ensag al pè dels pals, mas Limós demòra dins la partida amb un ensag del talonaire Boscairòl. Carcassona s’envòla cap a la victòria amb dos ensages de l’autre fijian Maika Serulevu per ganhar 29-16.

A Vilanòva, la partida fàcia als Dragonets s’arrestèt un desenat de minutas per daissar passar la granissa. Los catalans faguèron la diferéncia sus la fin mercé a doas penalitats per véncer 14-10.

A Carpentràs, Albi s’impausèt logicament fàcia a la formacion d’Elèit 2: 22-6 a la pausa e 40-10 al final. Atal, los primièrs tres del classament del Super-XIII son qualificats per las mièjas finalas de la Copa previstas per l’arribada de la prima dins un sol estadi lo 22 o lo 23 de març.

Demorava de conéisser lo quatren convidat. Dimenge, a Vilagalhenc, aprèp aver eliminat Vilafranca en ueiten, lo VARL recebiá lo Tolosa Olimpic. Mas, malgrat una brava partida, lo sòmi dels Singlars de Cabardés s’acabava amb una desfaita onorabla 8-18.

Novèl dèrbi a Domèc

Carcassona e Limós se tornaràn trapar a Domèc aqueste dimenge 16 de febrièr de vèspre pel compte de la 15a jornada del Super-XIII.

Dissabte, se jogaràn las partidas Vilanòva-Albi e Dragonets-Avinhon. Dimenge, Pià-Lesinhan e lo dèrbi St Gaudenç-Tolosa son al programa.

Los Dragons dins lo darrièr quart d’ora

Los Dragons Catalans dobrissián lor sason oficiala per un setzen de Cup sus la pelena de las Pantèras d’Halifax, formacion del Championship. Al cap de 50 minutas, lo planchòt indicava totjorn un tristonet 0-0. Artús Morgue passa una penalitat a la 52a minuta. Fouad Yaha marcarà un ensag (63a) e Cesar Rougé i va de son ensag personal (77a). Amb las transformacions d’Artús Morgue, los catalans se qualifican 14-0.

Deuràn faire mòstra d’un jòc mai dinamic e mai collectiu divendres de ser a Brutus per la recepcion d’Hull FC per la primièra jornada de la Superliga e entamenar d’un bon biais la sason novèla.

Serà Sant Valentin e doncas l’escasença pels esportius catalans e occitans de dire lor AMOR pel rugbi de XIII!

Del costat de Parramatta

Dissabte, a Parramatta, se jogaràn las partidas cò de les femeninas e cò dels òmes entre las seleccions aborigènas d’Austràlia e maàris de Nòva Zelanda. Serà l’escasença de tornar trapar la difusion de partidas de XIII sus BeInSport.