La comuna de Chastèldalfin (Val Varacha) a decidit de suspendre immediatament los pagaments a Enel, la companhiá electrica responsabla de l’alumenatge public, a causa de son incapacitat per resòlver divèrsas panas que daissan una bona part de la populacion dins l’escurina dempuèi octòbre de 2024.

Lo cònsol màger, Domenico Amorisco, remarca que l’esclairatge public es un servici essencial, mai que mai pendent l’ivèrn, quand las estradas cobèrtas de nèu o de gèl aumentan lo risc d’accidents. “Los ciutadans an rason de se plànher”, çò ditz Amorisco en criticant la non-responsa a las demandas jornadièras de la municipalitat a Enel.

Casteldelfino paga 750 èuros mesadièrs per aquel servici, mas l’elegit o qualifica de “ver marrit servici”. Per aquela rason, la comuna a suspendut los pagaments e estúdia de cancelar lo contracte amb Enel, qu’expira lo 31 de març de 2026. La mesura rebat la frustracion creissenta davant la manca de mantenença e la prioritat de garentir la seguretat dels ciutadans.

L’Assemblada Occitana de las Valadas a manifestat son sosten a la comuna dins lo  quotidian Cuneo Dice.