Los Estats Units ajudèron l’Iraq de Saddam Husayn a emplegar d’armas quimicas contra l’armada iraniana. En plen debat sus l’usatge del gas sarin en Siria, la prestigiosa revista estatsunidenca Foreign Policy a publicat de documents e de declaracions de nauts responsables qu’o confirman. A aquela epòca, en 1988, Saddam Husayn èra un aliat notable dels Estats Units.
 
Segon los articles publicats per Foreign Policy, en un moment que la guèrra èra complicada per Iraq, los Estats Units l’ajudèron en liurant d’informacions dels satellits suls movements de las tropas iranianas. Contràriament a çò que se diguèt alavetz, los documents mòstran que los assessors estatsunidencs sabián plan que la defensa iraquiana emplegariá de gas sarin per avançar en aquel conflicte.
 
Qualques militars estatsunidencs o an admés publicament a la revista. Los documents pròvan tanben que l’estructura militara de comandament, amb la CIA, sabián qu’Iraq emplegava las armas quimicas e qu’en cap de moment faguèron pas res per o arrestar. Quitament encoratgèron Saddam Husayn a las emplegar, e mai se los Estats Units avián signat la convencion qu’enebís l’usatge d’armas quimicas, qu’Iraq signèt pas.