La vila sarda catalanofòna de l’Alguer fa un pas endavant per la normalizacion lingüistica dins l’administracion publica. Aquesta setmana, la comuna a començat una nòva estapa amb l’emplec d’entitolats en catalan e en italian dins totes los documents institucionals, tant dins las decisions de gestion coma dins las resolucions de l’assemblada e de la direccion de la comuna.

Lo bilingüisme serà emplegat dins lo blason de la comuna amb l’inscripcion “Ciutat de l’Alguer – Città di Alghero”, ont se mençona lo catalan d’en primièr. La nomenclatura en catalan s’estend tanben als sectors e servicis qu’editan los actes oficials. “Una primièra conquista importanta, un primièr pas decisiu per la valor de la lenga que constituís l’identitat istorica”, çò declarèt lo cònsol màger Raimondo Cacciotto (centresquèrra), en assegurant qu’”aquesta iniciativa marca lo ponch culminant d’un camin començat en 2018 amb la creacion del Conselh Civic de las Politicas Lingüisticas, al qual exprimissi tota ma reconeissença pel trabalh realizat e que contunha amb abnegacion”.

Segon lo cònsol màger, es una accion conjoncha entre la comuna e la Consulta, l’organisme institucional de referéncia en politica lingüistica, amb lo reviscolament de l’Ofici Municipal de Politica Lingüistica e lo trabalh dels emplegats d’aqueste ofici que realizèron las traduccions. Lo passatge al bilingüisme dins los documents administratius foguèt la primièra demanda de la Consulta, en octòbre de 2018.

Lo pas seguent dins la redefinicion de l’identitat visuala del catalan consistirà a metre a disposicion dels organismes e entitats qu’o demandan un emblèma tanben bilingüe per la promocion d’eveniments e manifestacions.

Mai enlà, lo conselhièr encargat de las politicas lingüisticas, Francesco Marinaro, expliquèt las accions venidoiras. “Ara planificam un dialòg mai intens amb las escòlas per començar, fin finala, l’ensenhament de l’alguerés dins las escòlas mairalas e primàrias, la continuacion del procès de certificacion lingüistica en collaboracion amb l’Universitat de Sàsser, e cada iniciativa destinada a revalorizar la lenga nòstra dins sos aspèctes social e cultural”, çò precisèt lo conselhièr.

🥳💥 Un dels èxits lingüístics d'enguany!

L'Alguer acaba d'oficialitzar la nomenclatura en català com a prioritària als estaments i serveis municipals. Sota l'escut quadribarrat, la nova denominació serà bilingüe i el català, preferent.

La normalització, legítima, avança! pic.twitter.com/KA9Uy6Agkk

— Xavier Dengra i Grau (@xavidegr) February 7, 2025