Dempuèi son retorn al poder, Donald Trump a mes en plaça una politica qu’a per mira d’eradicar tota referéncia a las questions climaticas e socialas dins las recèrcas scientificas finançadas pel govèrn federal, çò rapòrta Reporterre. Aquela mesura, apelada “l’abrogacion de Woke”, enebís l’utilizacion de tèrmes jutjats tròp engatjats, coma “clima”, “emissions de gases d’efièch de sarra” o encara “justícia environamentala”.

Alessandro Rigolon, professor en urbanisme a l’Universitat d’Utah, a degut modificar lo títol de sas òbras per servar una subvencion: “Lor plan es d’utilizar l’intelligéncia artificiala per detectar dins totes los projèctes finançats pel govèrn federal los mots e los contenguts proïbits”, çò denóncia Rigolon.

Fòrça cercaires, estabosits, patisson l’amplor d’aquela censura, que s’espandís tanben als tèmas d’equitat raciala, de genre e d’inclusion. La professora en psicologia Darby Saxbe, de l’Universitat de Califòrnia del Sud, a publicat una lista de près de 120 mots interdiches, inclús “femna”. Aquel document li es estat transmés per un responsable de la Nacional Science Foundation, una agéncia dotada de 9 miliards de dolars (8,7 miliards d’èuros) annadièrs, destinats a sosténer la recèrca scientifica. “S’agís d’una guèrra contra la sciéncia”, çò conclutz categoricament Saxbe.

Segon un document intèrne revelat pel The Washington Post, las demandas de finançament que respècten pas aquelas nòvas règlas faràn l’objècte de modificacions o d’anullacions. Aquela situacion a ja forçat de cercaires de demandar d’argent a de parents per subvenir a lors besonhs après la supression de lors finançaments.

D’ autre caire, aquela politica se limita pas a las subvencions. De nombrosas informacions ligadas a la crisi climatica desapareisson progressivament dels sits governamentals, remplaçadas per de messatges d’error 404. Tyler Norris, doctorand a l’Universitat Duke (Carolina del Nòrd), a constatat la supression de sas recèrcas suls rets electrics del sit del Ministèri de l’Energia; una faiçon del govèrn Trump d’evitar tota concurréncia dins la promocion dels combustibles fossils.

Davant aquela situacion dramatica, de scientifics e d’organizacions de susvelhança, coma l’Environmental Date & Governance Initiative, crenhon una èrsa massissa de supression d’informacions dins los meses avenidors. La comunautat scientifica, inquieta, denóncia una ataca frontala contra la libertat de la recèrca e la difusion del saber.

🚨BREAKING. From a program officer at the National Science Foundation, a list of keywords that can cause a grant to be pulled. I will be sharing screenshots of these keywords along with a decision tree. Please share widely. This is a crisis for academic freedom & science.

[image or embed]

— Darby Saxbe (@darbysaxbe.bsky.social) 4 de febrer del 2025, a les 2:26