A l’iniciativa de l’associacion Nosauts de Bigòrra e en collaboracion amb de divèrses partenaris coma Eth Ostau Comengés, Federacion Víver au País – Ràdio País e Numericultura Gasconha, se lança en 2025 lo Concors Eurocvision en Gasconha, una competicion que vòl valorizar l’expression orala en occitan gascon e en d’autras lengas vernacularas. Aquesta iniciativa es inscricha dins lo quadre del projècte Tramontana IV, sostengut per Euròpa Creativa. Lo concors es dotat d’un prèmi total de 30 000 eùros per recompensar los melhors participants.

Un concors dobèrt a totes e en mai d’una categoria

Lo concors es dobèrt a totes, sens limit d’edat ni d’exigéncia de residéncia, levat per la categoria joves creators, reservada als mens de 18 ans. Comprend uèch categorias que permeton de metre endavant la diversitat artistica e lingüistica:

• Prèmi cants e musicas amplificadas

• Prèmi grops e cants corals

• Prèmi joves creators

• Prèmi tèxtes clamats e contes

• Prèmi familha de lenga d’òc

• Prèmi lengas vernacularas

• Prèmi recòlta al près dels locutors

• Prèmi portaires de lenga

Los candidats pòdon presentar una òbra per categoria e participar dins tres categorias al maximum.

Calendari e participacion

• Dobertura del concors: 15 de febrièr de 2025

• Inscripcion: fins al 30 de junh de 2025

• Mandadís de las òbras: fins al 30 d’octòbre de 2025.

Per participar, los candidats devon mandar lor enregistrament per e-mail a eurocvision@orange.fr, en indicant lors nom, prenom, adreiça e contacte.

Tematicas privilegiadas

Per aquesta primièra edicion, lo tèma es liure, mas los organizaires seràn sensibles als subjèctes documentats pel ret Tramontana, coma:

• Las mobilitats socialas e culturalas, actualas e passadas

• L’environament e l’aiga

• L’agropastoralisme e la transumància

• Las percepcions dels païsatges naturals e montanhòls

Remesa dels prèmis e visibilitat dels participants

Los participants seleccionats seràn presentats durant de seradas de remesa de prèmis organizadas en Gasconha. Los ganhants deuràn èsser presents per interpretar lor òbra, levat pels participants de la categoria lengas vernacularas, que poiràn enviar un vidèo de qualitat.

Un CD collectiu serà enregistrat amb las òbras premiadas e difusat sus las ondas de ràdio e dins l’internet. En mai d’aquò, los artistas seleccionats auràn l’escasença de participar a de residéncias de creacion, de festenals internacionals e de programas de promocion mediatica.

Dotacion dels prèmis

Lo concors repartís 20 000 èuros en numerari e 10 000 èuros en dotacions. Per exemple, lo Prèmi Musicas Amplificadas recompensarà los primièrs tres amb 3000 èuros, 2000 èuros e 1000 èuros, acompanhats de diplòmas e de presents. Las autras categorias auràn tanben de prèmis en argent e en dotacions materialas.

Un eveniment per la promocion de l’occitan e del plurilingüisme

Lo Concors Eurocvision en Gasconha es una ocasion unica per celebrar la diversitat lingüistica e artistica, en metent endavant lo gascon e las lengas vernacularas dins un encastre creatiu e professional. Un eveniment de seguir de pròche per totes los qu’an a còr la promocion de las lenga e cultura occitanas de Gasconha.