Lo dramaturg provençal Andrieu Neyton nos quitèt diluns passat a 90 ans. Las obsèquias se tendràn dimars 18 de febrièr a 14h15 al Centre Dramatic Occitan de Tolon (10, Carrièra Orves).

Lo teatre marquèt tota la vida d’Andrieu Neyton. Tot jovenòt, après un rescontre determinant amb Robèrt Lafont, quitèt l’Escòla Normala e se consagrèt a la scèna. Interpretèt las pèças de Lafont, metèt en scèna las òbras de Florian Vernet e Renat Merle, e creèt tanben sas pròprias produccions. Fa gaire, publiquèt Il fallait être fou, un libre-testimoniatge sus son percors singular.

Òme engatjat, refusèt tota concession a las idèas politicas de refús de l’autre, çò rapòrta la FÈLCO: “Puslèu crebar la fam que d’acceptar de se sometre quand sa vila, Tolon, foguèt presa per la drecha extrèma”.

Per el, de far de teatre en occitan èra “utilizar un mejan de lucha per sauvar la lenga de la desparicion”, çò disiá dins una entrevista per Jornalet. “Venguèri au teatre d’òc dins leis ans setanta ont la creacion, cançon e teatre, èran considerats coma d’armas per la reconquista de la lenga e la reconoissença de la realitat d’una Occitània”, çò precisava.