Actualitats
Nos a quitats Gustau Aliròl, figura clau de l’occitanisme politic
Consagrèt sa vida a l’avançada de l’autonomisme, al refortiment de l’identitat occitana e a la collaboracion entre los movements dels pòbles minorizats
Tèxte legit
Gustau Aliròl, una de las figuras mai conegudas de l’occitanisme politic, es mòrt a 76 ans a causa d’una malautiá folzejanta. Foguèt president de Volèm Viure al País, cofondador del Partit Occitan e de la federacion Regions e Pòbles Solidaris, aital coma vicepresident de l’Aliança Liura Europèa.
Long de sa trajectòria, Aliròl consagrèt sa vida a l’avançada de l’autonomisme, al refortiment de l’identitat occitana e a la collaboracion entre los movements de las nacions minorizadas. En mai d’aquò, exerciguèt pendent dos mandats coma cònsol màger de Sant Ostian (Velai). Son decès arriba pauc après la mòrt de sa molhèr, un fach que l’aviá tresvirat prigondament dins los darrièrs meses.
Las funeralhas se tendràn dimècres 19 de febrièr de matin, a la glèisa de Sant Ostian.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Apreni lo decès de Gustau Aliròu fòrça conegut coma abnegat e sincèr militant politic occitan de longa tòca, primièr coma president de Volèm Viure al País, puèi del Partit Occitan e de Regions e Pòbles Solidaris, vicepresident de l'Aliança Liura Europèa e cònsol màger de Sant Ostian dins Léger Naut. Partidari de l'autonomia per Occitània, s'èra totjorn opausat al nacionalisme e a l'independentisme occitan preconizat pel Partit de la Nacion Occitana. Aquò l'empachava pas de trabalhar dins RPS amb de movements nacionalistas e independentistas. Se situant a esquèrra de l'escaquièr politic e adversari politic del PNO que considerava coma un partit de drecha, l'aviá empachat d'aderir a RPS. Pasmens, respècti l'òme e lo militant occitan malgrat nòstras divergéncias. Al nom del PNO, adreci al Partit Occitan, a RPS, a l'ALE, a sos mainatges e a sa familha mas mai sincèras condolenças.
Adiu manhac ! Un camin remirable . Mon amistat .Vòlèm viure al pais uei e deman .
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari