Una marcha percorreguèt lo País Marselhés de dijòus a dissabte per demandar la liberacion del cap curd Abdullah Öcalan, encarcerat dempuèi 1999, e una solucion democratica al conflicte que lo patís aquel pòble de l’Orient Pròche. La marcha comencèt dijòus al Martegue e finiguèt dissabte a Marselha, amb la participacion de centenas de personas.Exigisson la fin de l’isolament e de la tortura d’Öcalan, e tanben un estatut politic per Curdistan. Pendent la marcha, los participants distribuiguèron de fulhetons e faguèron de declaracions en curd, francés e turc per sensibilizar la populacion a la causa d’aquela nacion sens estat.

L’eveniment marselhés fasiá part de la “longa marcha” dels curds sortits de divèrsas vilas d’Euròpa que se rescontrèron dissabte, 15 de febrièr, a Estrasborg (Alsàcia) ont s’acampèron plusors milièrs de personas.

La mobilizacion, organizada pel Conselh Democratic Curd de França (CDK-F), amassèt fins a 20 000 participants, segon los organizaires. Los manifestants portavan de bandeiròlas amb d’eslogans coma “libertat per Öcalan, una solucion politica a la question curda”.

La protèsta d’Estrasborg clava una marcha simbolica que comencèt fa 26 jorns a Lanester (Bretanha), e correspond al 26n anniversari de la presa d’Öcalan. Los organizaires espèran qu’aquela pression internacionala menarà a un “movement istoric” per la patz e la libertat d’aquela nacion.

Öcalan foguèt arrestat en Kenya lo 15 de febrièr de 1999 per d’agents especials turcs qu’agissián en ligam amb la CIA e lo Mossad, del temps qu’èra en camin vèrs l’ambaissada grèga a l’aeropòrt de Nairòbi ont aviá demandat l’asil. Lo cap curd foguèt liurat a Turquia ont es encarcerat dins l’illa d’İmralı, dins de condicions d’isolament fòrça grèvas.

💛❤️💚 Thousands of Kurds and their friends have filled the streets of Strasbourg, as they dance govend and march for Abdullah Öcalan’s freedom.

Bijî Serok Apo! 🔥 Bê Serok Jiyan Nabe! ✌🏼 pic.twitter.com/FscyjoeUR9

— FREEDOM for ÖCALAN 🕊️ (@Vigil4Ocalan) February 15, 2025