BeInSport retransmetrà dins la nuèit del dissabte 1r al dimenge 2 de març las partidas NRL disputadas a  Las Vegas; a l’ora occitana: una ora del matin per Canberra fàcia als Combatents Neozelandeses e 5 e mièja pel rescontre entre Penrith e Cronulla. Coma qué, lo solelh se colca pas jamai sus la planeta XIII!

Aqueste dissabte 15, a Parramatta, aborigèns e maòris se rescontravan sus una pelena als en-buts decorats de motius autoctòns. Cò de las femnas, corta victòria de las aborigènas: 20-18 mercé a una penalitat sus la còrna. Cò dels òmes, se marquèt pas cap de punts dins lo primièr temps. Los aborigèns dobriguèron la marca, mas los maòris repliquèron amb dos ensages per emportar la partida 10-6.

Represa plan tristoneta pels Dragons

Dijòus de ser, lo rescontre entre lo campion Wigan e Leigh dobrissiá la sason novèla d’un biais estonant. Al cap de las 80 minutas, lo planchòt afichava un 0-0! Lo dobertura de Leigh passèt lo tombat de la susprenenta victòria sus una marca jamai vista dempuèi la naissença de la Superliga: 1-0!

Divendres, la partida Hull K-Castleford anèt tanben al punt en aur favorable a Hull 19-18. A Brutus, i agèt pas de prolongacion que los catalans presentèron una palla figura: jòc estequit, impossibilitat de marcar dins lo temps de dominacion per encaissar tres ensages dins lo primièr temps (0-18) e trapar pas cap de solucion per pèrdre 4-24.

Dissabte, Wakefield festejava son retorn al primièr nivèl en anant ganhar a Leeds 14-12. Saint Helens atomiza 82-0 una formacion amendrida de Salford, de Diables Roges rescapats en Superliga mercé a sa crompa per un proprietari novèl: lo PDG d’una banca d’investiment dins l’immobilièr.

Dimenge, los Lops de Warrington jogavan a Huddersfield e s’impausèron 20-12.

Divendres que ven (21 de febrièr), los Dragons aniràn desfisar aqueles Lops de Warrington: serà pas una partida de plaser.

Los Dragons an acabat per obténer l’acòrdi de la cadena internet L’Équipe per la retransmission de sas 27 partidas de Superliga que se pòdon tanben seguir sus la cadena especifica de la Superliga e, en catalan, sus TV3 e Sport3.

Pel compte dels ueitens de la Cup, lo 15 o lo 16 de març, los Dragons reçaupràn una formacion del Championship: los Featherstone Rovers. Quatre partidas opausaràn clubs de Superliga: Widnes-Warrington, St Helens-Leeds (una brava aficha), Huddersfield-Wakefield e Wigan-Hull FC. Bradford, qu’a fait cabussar Castelford al torn precedent, aurà son escasença fàcia a Salford.

Entama mancada pel TO

Per entamenar la sason novèla del Championship, aqueste dissabte 15, lo Tolosa Olimpic recebiá los Vikings de Widnes. Los angleses marcavan lo primièr ensag transformat, mas lo TO replicava a la mièja ora de jòc e preniá l’avantatge 8-6 mercé a una penalitat. Los tolosans ajustavan un novèl ensag transformat a l’ora de jòc, mas lo darrièr quart d’ora permetiá als Vikings de ganhar 18-14.

Lo TO retransmetrà totas sas partidas a domicili sus sa cadena YouTube. Dimenge que ven, 23 de febrièr, la formacion occitana anirà en Anglatèrra per rescontrar York.

Super-XIII: quatre victòrias al defòra

La quinzena jornada del Super-XIII se dobriguèt dissabte sus una brava suspresa: la victòria d’Avinhon a Sant Estève fàcia als Dragonets que corriguèron long de la partida darrièr los avantatges preses pels provençals que s’impausan 28-24. Mai logicament, Albi va batre Vilanòva: 16-6.

Dimenge, Carcassona e Limós se tornavan trapar sus la pelena de Domèc una setmana aprèp lo quart de Copa. Los limosencs obtenguèron lo revenge al tèrme d’una partida borrolaira: un tombat faguèt la diferéncia: 23-22. S Gaudenç anava ganhar lo dèrbi de Nauta Garona a Tolosa 42-24. Sols, los Batalhièrs de Pià demorèron mèstres a l’ostal fàcia a Lesinhan: 36-18.

Las mièjas finalas de la Copa, que se tendràn la dimenjada dels 22 e 23 de març, veiràn las oposicions Carcassona-Albi e Dragonets-Tolosa.

Aqueste dissabte 22, a Avinhon, lo XIII de França rescontrarà l’esquipa de Marròc.