Actualitats
15 dias per l’occitan a Tarba
L’eveniment, que’s debanarà dinc au 27 de heurèr, que s’inscriu dens las 30 mesuras adoptadas per la region entà la preservacion e visualizacion de las lengas ditas regionaus
La region dita Occitània qu’organiza a Tarba ua quinzena d’animacions e d’activitats entà promòver la lenga occitana e demostrar qu’ei tostemps hèra viva, ce rapòrta La Dépêche du Midi. Aqueth eveniment, aperat “Parlem! catalan e occitan”, qu’a per mira d’amassar los locutors de l’occitan e iniciar los novicis.
Dinc au 27 de heurèr, l’Ostau de la Region Occitània de Tarba que prepausa ua exposicion consagrada a l’istòria e l’aprendissatge de l’occitan e deu catalan, atau com quauques animacions destinadas aus mainatges. Entà inaugurar aquera quinzena, ua partida d’improvisacion teatrau en occitan qu’opausè, lo 12 de heurèr passat, duas esquipas de collegians de Pau, en metent en valor lo dinamisme e la vitalitat de la lenga.
L’eveniment, organizat desempuish dus ans dens la region e peu purmèr còp a Tarba, que s’inscriu au miei de las 30 mesuras adoptadas per la region entà la preservacion de las lengas ditas regionaus.
Segon Nicolas Falxa, encargat de desvolopament de l’Ofici Public de la Lenga Occitana (ÒPLO), haut o baish 70 000 mainatges que practican uei l’occitan. “Dens las nostas duas regions d’analisi, la Nava Aquitània e Occitània, haut o baish lo 7 % deus abitants que son capables de tiéner ua conversacion en occitan”, ce precisa.
Entà Rémi Berdou, responsable de las associacions deu CIRDÒC, l’occitan qu’ei tostemps ua lenga d’actualitat, “mestièrs que demandan personas qui lo saben parlar, artistas que l’utilizan enqüèra e que s’inscriu perfèitament dens lo sègle XXI”, ce disó.
Que podetz consultar lo programa sancer aciu.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Sabi ben que i a sonque los que jamai non fan res que tanpauc jamai non s'enganan… encara qu'aqueste lòc comun pòsca paréisser fòrça discutible, per nosautres occitanistas ! Totun, quand legi un títol coma : "15 dias entà l'occitan a Tarba" me malcòra un pauc de trobar dejós, per dire d'o illustrar, l'image sinistre d'una plaça voida que voidassa… D'un autre costat, admèti plan volontièrs qu'illustrar amb un image l'anonciada d'un eveniment qu'encara non a pres plaça, aquò deu èsser un pauquet complicat tanben ! Mas las idèas non mancan pas : l'image de qualques enfants a mand de rire m'auriá, per exemple, portat un autre sentiment.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari