La quinzenada d’animacions occitanas de Fasètz la Lenga en Cabardés se tendrà del dimars 4 al dissabte 15 de març.

L’estrena se farà lo dimars 4 a 18h30 a Ventenac de Cabardés. Aprèp los discorses introductius e la prestacion del grop vocal Cossí Que Siague, la formacion Trio Nòra se produsirà a 20h45.

Dimècres 5, a 20h45, a l’Ostal de Cabardés d’Argon, Florant Mercadièr explicarà amb una brava dòsi d’umor Occitània pels Nuls.

Retorn a Ventenac lo divendres 7 per la representacion de La Pastorala dels Volurs, una pèça escrita per Max Roqueta e interpretada pels comedians de la tropa del Clapàs, TIO-La Rampa.

Dimenge 9 de vèspre, l’associacion Patrimònis-Valadas de Cabardés animarà una passejada a l’entorn de Vilagalhenc.

Dimars 11, a 20h45, conferéncia a Mossolens de l’istorian Felip Martèl a prepaus de “Joan Jaurés, l’occitan”.

Plaça a la cançon dimècres 12 (20h45) a Puègnautièr amb lo cantaire roergàs Arnaud Cance e son recital Saique benlèu.

La quinzenada se clavarà dissbate 15 a Vilagalhenc (sala polivalenta) amb una taulejada conviviala (19h), seguida d’un balèti amb lo qüatuor tarnoariegés Frezinat.

Obradors de lenga e de convèrsa son previstes a 18h a Argon (lo 5), Ventenac (lo 7), Mossulens (lo 11) e Puègnautièr (lo 12). Entre l’obrador e l’animacion del ser: albèrga occitana (repais tirat de la saqueta).

De mai, lo musicaire Jocelin Papon virarà dins las escòlas dels cinc vilatges per una presentacion dels instruments de musica lengadocians.

Una formula-abonament pels quatre principals espectacles es prepausada (35 èuros). Per la taulejada, inscripcion necessària abans l’11 de març. Contacte associacion: +33(0)6 14 39 16 39 o +33(0)6 95 58 73 52, facebook.com/fasetzlalenga.

Fasètz la Lenga en Cabardés prepara tanben una jornada de rescontre de grops vocals occitans lo dimenge 18 de mai a Vilagalhenc e una serada de cinèma jos las estelas lo dimars 17 de junh a Argon.

Autres rendètz-vos audencs

Del 14 al 29 de març, se debana tanben lo festenal Prima de las Nòtas a Alaiurac. Dins la programacion, una serada amb Anches-Mains e Rémi Geffroy lo divendres 21.

Lo Carnaval del quartièr de Trivala a Carcassona permetrà de véser la conferéncia borlesca del Teatre de las Originas lo divendres 28 de març (sala del Capèl Roge); lo dissabte 29, Tonton A Faim acompanharà musicalament lo passacarrièra menat per las calandretas de Carcassona.

A la debuta d’abril, aurà luòc la setmana Concas en Òc amb la mòstra suls molins d’Aude de Maria-Teresa Montané, una conferéncia suls molins dins l’imaginari occitan, contes pels escolans d’Ives Durand e lo Carnaval de las escòlas e del vilatge lo divendres 11, menat per l’Escòla de Bodega de Vilardonèl.