Après la victòria del miliardari ultradrechista Donald Trump a las eleccions de 2024, la politica estrangièra dels Estats Units a pres una virada notabla dins sas relacions amb Ucraïna. Lo president ucraïnés, Volodimir Zelenski, es estat un defensor constant del sosten militar e economic occidental a son país, mas sas relacions amb la novèla administracion estatsunidenca son pas exemptas de tensions.

Una virada estrategica

Dins lo contèxt de la guèrra, la postura de l’administracion Trump sembla de marcar un alonhament clar de l’agenda tradicionala dels Estats Units. Mantuna declaracion met en dobte la prioritat balhada a l’ajuda al país eslau. Lo president ucraïnés qualifica de desinformada l’actitud de Trump a respècte de la guèrra e declara que sa passivitat aparenta davant l’invasion russa ajuda Putin a sortir de son isolament, suggerissent que lo menaire republican pareis d’acordar mai d’importància al dialòg amb lo Kremlin qu’a la seguretat d’Ucraïna.

Trump, el meteis, es criticat per aver suggerit que la guèrra en Ucraïna poiriá èsser resolguda aisidament per una negociacion amb Vladimir Putin, sens la preséncia activa d’Ucraïna a la taula de las negociacions. Aqueles prepauses an enflamat los esperits a Kyiv, ont Zelenski quita pas de dire qu’acceptarà pas cap d’acòrdi qu’excluga son país, afortissent que «se pòt pas parlar d’Ucraïna sens Ucraïna».

Las tèrras raras e lo mesprètz envèrs Zelenski

Lo novèl govèrn Trump sembla d’èsser mai concentrat sus un acòrdi de cooperacion economica qu’implique Ucraïna, amb l’interès d’obténer l’accès a sas ressorsas naturalas en escambi del sosten militar. Pasmens, l’accent mes sus las tèrras raras pareis de relegar al segond plan los besonhs immediats de defensa qu’Ucraïna sollicita per arrestar l’agression russa.

Parallèlament, a Washington, d’autras figuras politicas coma Elon Musk e Mike Waltz, conselhièr de la seguretat nacionala del president dels Estats Units, an dobèrtament exprimit lor mesprètz envèrs Zelenski, pretendent qu’es “mespresat pel pòble ucraïnés, mentre qu’es fòrça popular, e qu’insulta Trump. Aquelas declaracions soslhinant un alonhament creissent de l’administracion estatsunidenca a respècte de la politica de sosten activa a Ucraïna menada jos Biden.

Reaccions en Euròpa

A l’internacional, las reaccions son partejadas. Lo lideratge europèu a exprimit d’inquietuds pertocant los cambiaments de la politica internacionala dels Estats Units d’America. De personalitats coma Kaja Kallas, responsabla de la diplomacia de l’UE, avertisson qu’un acòrdi entre Trump e Putin qu’excluriá Ucraïna fariá perilhar l’estabilitat del continent, soslinhant la necessitat d’un apròchi mai coerent e inclusiu.

Un avenidor malsegur per Ucraïna

Amb un govèrn Trump pauc interessat per la defensa activa d’Ucraïna mas favorable a una politica que privilègie los acòrdis economics als besonhs militars immediats, la situacion per Kyiv se complexifica. Las tensions creissentas e las discussions intèrnas als Estats Units poirián destabilizar las alianças internacionalas dont Ucraïna a besonh per contrar la menaça russa.