Actualitats
Los atacs de l’Armada Electronica Siriana an causat de confusion sus Internet per lor efectivitat
Dimars passat s’apoderèt pendent qualques oras dels sits web del New York Times e del domeni de Twitter
De totas las armadas del Mond, oficialas e non oficialas, la que mai d’estonament a desvelhat es l’Armada Electronica Siriana (AES) que, dimars passat, ataquèt lo jornal TheNew York Times en remandant lo transit a una adreiça pròpria; e mai cambièt lo registre de domeni de Twitter, que pendent qualques oras foguèt oficialament registrat en nom de l’AES.
Los atacs mai o mens persistents de grops d’hackers sus de grands domenis d’Internet son abituals mas es fòrça estranh que capiten ben lor tòca. Dins aquel sens l’AES es en una progression notabla de reüssidas dempuèi lo sieu primièr atac reconegut contra de sits web occidentals, que se passèt lo 23 d’abril passat.
Aquel jorn raubèron lo compte de Twitter d’Associated Press e, d’ailà, faguèron de fiuladas falsas en assegurant qu’una bomba aviá espetat dins l’Ostal Blanc e qu’Obama èra mòrt. La fiulada aguèt un efièch dramatic sus la borsa dels Estats Units que s’esfondrèt en tres minutas, e se recuperèt quand l’Ostal Blanc confirmèt qu’Obama èra viu.
Pendent los meses seguents ataquèron divèrses tipes de servidors e de servicis d’Internet, aparentament non restacats a la politica o l’informacion. Mas lo 15 d’agost passat, la còla de l’AES capitèron un grand resson quand capturèron lo servidor d’anoncis d’Outbrain. Mercés a aquò publiquèron de publicitats de l’AES dins totes los grands jornals numerics dels Estats Units.
Aquelas darrièras accions de l’Armada Electronica Siriana, compresas la doas de dimars, an fach sonar totas las alarmas. L’AES èra relativament coneguda dins lo mond arabi ont aviá ja hackejat divèrses sits web, mas an creat subitament una alarma evidenta pels païses occidentals, mai que mai pels Estats Units.
De l’AES se’n sap pas grand causa. Se sap pas s’es restacada al govèrn sirian. Eles o negan categoricament mas d’expèrts informaticians de divèrses païses los creson pas. De fach, Bashshar Al Asad n’a parlat elogiosament en divèrses discorses e el meteis èra lo president de la Societat Informatica Siriana, ont se crei que nasquèt l’AES.
Curiosament lo contraròtle d’Internet en Siria es plan naut.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari