Un estudi recentament publicat dins la revista Nature met en lum una acceleracion preocupanta de la fonda dels glacièrs dins lo Mond entièr, amb un accent particular sus Euròpa. Entre  los ans 2000 e 2023, aqueles glacièrs perdèron en mejana lo 5% de lor volum, una pèrda estimada a 273 miliards de tonas de glaç per an. Aquela fonda intensa concernís particularament los Alps e los Pirenèus, ont lo 39% de las resèrvas de glaç an desaparegut en dos decennis, una chifra alarmanta que fa d'aquelas doas regions las mai afectadas del Mond.

L'estudi se faguèt en doas pontannadas. Entre lo primièr periòde de l'estudi (2000-2011) e lo segond (2012-2023), la velocitat de pèrda de massa glaciària aumentèt d’un 36%, passant en mejana de 231 miliards a 314 miliards de tonas de glaç desaparegudas annadièrament a l'escala mondiala. Los ans 2022 e 2023 enregistrèron de pèrdas recòrd, amb 550 miliards de tonas de glaç fondudas en 2023 solament. De lor costat, los Pirinèus e los Alps perdèron en dos ans entre lo 8 e lo 12% de lor massa glaciària, una chifra grandassa, e tot indica que i aura pas pus de glacièrs dins los Pirinèus en 2050.

Aquela fonda rapida a de consequéncias mondialas, contribuïssent a una elevacion del nivèl de la mar de 18 millimètres dempuèi 2000, representant mai o mens lo 20% de l'aument global dels oceans. Pels scientifics, aquò soslinha non solament l'urgéncia de la situacion, mas tanben l'acceleracion dels procèsses ligats a l’escalfament climatic.

L'estudi, menat per una cinquantena de cercaires, combina de donadas reculhidas sul terren e per satellits, analisant mai de 200 000 glacièrs a travèrs del Mond. Se cèrtas regions, coma Islàndia, veson una pèrda moderada, d'autras, coma l'Imalaia e los Andes, subisson tanben un aprimatge notable. Los cercaires avertisson qu'aquela tendéncia se poiriá perseguir, amb de consequéncias dramaticas tant pels ecosistèmas coma per las societats umanas.