La NRL dobrirà sa sason 2025 aqueste dissabte 1r de març a Las Vegas amb los rescontres: Canberrà fàcia als Combatents neo-zelandeses (una ora del matin, ora occitana), puèi entre Penrith e Cronulla (5 e mièja). Las partidas Warrington-Wigan e lo rescontre femenin Anglatèrra-Australia completaràn aqueste rendètz-vos american.

Aquesta iniciativa fa part de la volontat d’espandiment de la federacion australiana, l’ARL que parla tanben de renegociar los dreits televisats per 2027 (objectiu: Netflix?) e qu’es prèsta d’envisatjar una presa de contraròtle de la Super-Liga europèa.

Tot aquò s’apièja sul bilan bèl de l’annada 2024 per la federacion australiana: 4% de mai d’espectators; 9% de mai de telespectators; un excedent de 62 milions de dolars; la crompa de doas ostalariás… Lo XIII es vengut mai popular que lo fobal australian.

E nosaus, paures occitans e paures catalans que podèm plan faire dins lo vent grand de l’espòrt internacional?

Las sagetas enverinadas de Warrington

Per la recepcion dels Catalans, l’estadi de Warrington aviá cambiat de nom per prene lo del recent e jove campion del monde de sagetas e sosten del club, Luke Littler. Los Dragons dobrissián la marca sus penalitat. Mathieu Laguerre marcava un ensag pels catalans, mas los angleses egalizavan aprèp un ensag transformat en seguida de la marrida recepcion d’una candèla. Dins lo segond temps, los Dragons ensagèron en van, alara qu’una traucada del dobertura local puèi una ataca lèu menada sus una recuperacion de pauma balhavan doas ocasions d’ensags als Lops; lo segond ensag de Laguerre vendrà tròp tard e los locals l’empòrtan 18-12. Los catalans presentèron una prestacion mai engatjada e mai dinamica qu’a Brutús la setmana passada, mas cal encara capitar lo sofregit collectiu per poder esperar mai.

Divendres tanben, Wigan anèt ganhar aisidament cò d’Hull-FC 46-4 abans de s’encaminar cap a las Americas amb Warrington.

Dijòus; Hulll-KR l’aviá emportat 14-12 a Wakefield.

Doas novèlas victòrias al defòra dissabte: Sant-Helens se passeja a Castlefòrd 46-6 e Leeds ganha a Salfòrd 32-6, alara que los Diables roges podián jogar amb lor esquipa primièra aprèp la validacion de la direccion novèla del club per la RFL.

Dimenge, los Leupards de Leigh recebián Huddersfield que menava 8-6 a la pausa; fin finala, Leigh s’impausa 24-10; divendres, es justament a Leigh que jogaràn los Dragons: l’escasença de signar una primièra victòria?

Lo tombat sus la còrna

Dimenge, en Championship, lo Tolosa Olimpic s’impausa a Yòrk mercé a un tombat sus la còrna del mesclanha Jake Shorroks: 7-6. Partida venenta: lo dissabte 8 de març amb la recepcion de Bradfòrd que los Tolzans avián batuts 21-20 en mièja-finala la sason passada.

Una primièra per la seleccion marrocana

Aqueste dissabte, jos la pluèja ivernala, a Avinhon, una jove seleccion francesa rescontrava un formacion marrocana, formada de filhs e pichon-filhs d’immigrats nascuts en França. La partida foguèt agradiva e s’equilibrèt aprèp una entama favorabla als Blaus. Fin finala, los Pols l’empòrtan 34-10.

Una partida que mena a se pausar doas questions:

• per França: qual es lo plan de preparacion en vista del tornèg qualificatiu per la Copa del monde de 2026, tornèg previst a la tardor?

• per la seleccion marrocana: qunes mejans per prene part a las competicions continentalas africanas, sens doblidar lo desvelopament de la practica al país?

Supèr-XIII: un Limós-Pià prometeire

Aqueste dimenge, a Ille de Tèt, l’oposicion entre Dragonets e Vilafranca metiá a jorn lo calendièr del Supèr-XIII. Los Lops menan 12-4 a la pausa, mas pèrdon 14-22.

Per aquesta dimenjada, son previstas las partidas:

• dissabte: Lesinhan/Vilafranca, Vilanòva/Dragonets, Avinhon/Tolosa

• dimenge: SentGaudenç/Carcassona e Limós/Pià.