La Cort Europèa dels Dreches Umans (CÈDU) a emesa una senténcia istorica que condemna França per sa responsabilitat de la mòrt de Rémi Fraisse, un jove ecologista tolosan de 21 ans tuat en 2014 pendent las protèstas contra lo projècte de restanca de Sivens, en Galhaqués. La decision, emesa aqueste dijòus, 27 de febrièr, constata una violacion de l’article 2 de la Convencion Europèa dels Dreches Umans, pertocant lo drech a la vida.

Rémi Fraisse foguèt tuat per l’explosion d’una granada lançada per un gendarma la nuèch del 25 al 26 d’octòbre de 2014. La CÈDU considèra que lo nivèl de proteccion requist per contrarotlar los risques que representava l’usatge de fòrça potencialament letala èra pas garentit, en soslinhant las mancanças de l'encastre administratiu e legal alara aplicable e dins la supervision de las operacions.

Los avocats de la familha Fraisse an reagit amb esmoguda. “Quina pèrda de temps!” [per obténer aquela reconeissença], çò an declarat. Exigisson que França tire las consequéncias d’aquela decision e revise d'a fons sa politica de drech e d’òrdre. La CÈDU constata tanben que l’enquista penala èra pas entacada de cap de violacion d’independéncia e d’imparcialitat, e mai qualques audiéncias clau foguèsson pas menadas dins l’encastre judiciari.

La mòrt de Rémi Fraisse marquèt un ponch de virada dins las luchas environamentalas en Occitània, menant a l’arrèst del projècte de restanca de Sivens e a l’interdiccion de las granadas OF-F1. Malgrat aquela reconeissença tardièra, la familha de Rémi Fraisse espèra encara un omenatge nacional, après que la justícia francesa reconeguèt “la responsabilitat sens fauta de l’estat” en indemnizant la familha per prejudici moral amb una soma de 46 400 èuros.