Anuèch se tendrà un eveniment astronomic rar e força esperat pels aimadors d’astronomia: l’alinhament de sèt planetas de nòstre sistèma solar. Saturne, Mercuri, Neptun, Vènus, Uranus, Jupitèr e Mart seràn visibles simultanèament dins lo cèl nocturne, ofrissent aital un espectacle rar als observaires terrèstres. Los alinhaments planetaris son pas rars; en 2025, se'n veirà dos qu'implicaràn sièis planetas (en genièr passat, i aguèt lo primièr, e en agost se farà lo segond). Pasmens, d'observar un alinhament de sèt planetas es un eveniment excepcional que se manifèsta pas que 7 còps per millenari. Ara caldrà esperar fins en 2492 per lo reveire.

Malgrat que lo tèrme “alinhament” pòsca suggerir que las planetas son perfièchament alinhadas dins l’espaci, s’agís en realitat d’una perspectiva de la Tèrra estant ont aqueles còrses celèstes apareisson recampats dins una meteissa region del cèl. Las planetas son pas fisicament alinhadas en una linha drecha dins lo sistèma solar.

Per observar aquel fenomèn, es recomandat de causir un luòc amb un orizont desgatjat e una febla pollucion luminosa. Las planetas mai brilhantas, talas coma Vènus, Jupitèr e Mart, seràn vesidoiras a uèlh nud. Pasmens, per destriar Uranus e Neptun, l’utilizacion de pòrtavistas o d’un telescòpi farà besonh. Es possible que Mercuri e Saturne, planetas pròchas de l’orizont, se localizen pas sens esquipament apropriat.

Aquel alinhament coïncidís amb la luna novèla, çò que significa que l’abséncia de lutz lunar permetrà una observacion melhora de las planetas, sustot las mai flacas. Los astronòms amators e professionals son encoratjats a profechar d’aquela escasença unica per observar e estudiar aqueles còrses celèstes.

 

 

 

 

 

Voir cette publication sur Instagram

 

 

 

 

 

 

 

 

 

 

 

Une publication partagée par TheBrainMaze (@thebrainmaze)