La “naveta maritima” es un servici recent de la Regida dei Transpòrts de Marselha (RTM). Èra inicialament un assag previst solament en 2012 e 2013, a l’ocasion del ròtle de Marselha coma capitala europèa de la cultura. Mas aquel servici novèl a un grand succès, non solament entre los toristas, mas tanben e subretot entre los estatjants de Marselha que l’utilizan simplament amb de tiquets abituals de tramvai e de bus. Aquela linha de bus maritim va del quartièr de L’Estaca, al nòrd, fins a La Poncha Roja, al sud.
Aquela naveta, una mena de “bus maritim”, contunharà a Marselha. Aital o anoncièron lo 26 d’agost passat Eugène Caselli e Karim Zéribi, president de la comunautat urbana e president de l’administracion dels transpòrts respectivament, segon çò que publicava Aquò d’Aquí. Per aqueles dos politicians, candidats a las eleccions municipalas, s’agís d’un mejan de redusir la fractura territoriala de Marselha.
A l’ora d’ara a Marselha i a dos “buses maritims” que connèctan lo Pòrt Vielh amb La Poncha Roja e amb L’Estaca respectivament. Aquelas navetas foguèron dobèrtas pels toristas, a l’ocasion de la capitalitat europèa de la cultura, mas la reüssida foguèt per l’estrambòrd del public local, que trobèt un transpòrt public practic e efectiu, que connècta los quartièrs del nòrd e del sud amb lo centre de la vila. En sièis meses an transportat quasi mièg milion de personas.
“Nos a fach 2000 per jorn en mejana l’estiu, e [la naveta] s’èra prevista per un assai entre abriu e la mitat d’octòbre, ja vos pòdi dire qu’aquò serà perseguit”, çò anonciava Eugène Caselli, que la farà marcar dins lo budget 2014.
“Se tracta de redusir la rompedura territoriala entre lei marselhés”, çò apondèt Karim Zéribi. “Pas de ne faire mens per aquelei que vivon au Sud, mai ben de raprochar leis abitants dau Nòrd de sa vila”. “S’o aviam fach i a de temps, Marselha seriá a l’ora d’ara una ciutat-mond referenta en Mediterranèa”, çò apondèt.
Aqueles autobuses de la mar son pas tant excepcionals. De Tolon a La Sanha se’n prepausa tota la jornada. Cal simplament pagar dos tiquets de bus, e son rapids e segurs. A Marselha, cal aperaquí 40 minutas per anar del Lacidon a l’Estaca. E se los viatjaires pagan 3 èuros per lo trajècte, los abonats de l’RTM pagan pas res mai. Es un avantatge per los marselheses, que representan 54% dels viatjaires, dont 32% son dels arredondiments 15 e 16, aqueles de l’Estaca.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Ara cal dobrir una linha de Marselha a Sèta.
Òsca ! Avèm parièr a Calais, aquò es "Majest'in" que podèm anar d'un ponch de Calais a un autre ponch! ;-)
Es un bon debut mai basta pas. Fau perlongar lei ligason, per exemple fins ai Godas, que la granda part de l'estiu es completament envait per lei toristas.
E mai que mai, fau mai d'organizacion ! Qu'esperar tres quart d'oras coma un colhon davant l'entrada au Pòrt Vielh, a ieu mi fau cagar .
La vila a fach aquelei navetas per lei toristas mai esperava pas servir sei ciutadans .. ara fau assumir e "utilizar" la mar
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari