Aquela decision inesperada tomba après mai d’un an e mièg de batalhas juridicas. Lo tribunal a jutjat que l’arrèst prefectoral del 1r de març de 2023, que donava lo permís de construccion a l’entrepresa concessionària Atosca, deu èsser anullat. La decision, anonciada pels avocats dels militants ecologistas, a provocat d’escènas de jòia davant lo tribunau, amb de crits e acampadas dels opausants al projècte.

L’entrepresa Atosca a reagit en declarant que pren acte de la decision e qu’arrestarà los trabalhs.

L’estat anóncia una apelacion per suspendre la decision

Mas l’estat, de son costat, a pas tardat de reagir. Lo ministre dels transpòrts, Philippe Tabarot, a denonciat una situacion “absurda”, un talhièr avançat als dos tèrces arrestat del jorn a l’endeman. Lo govèrn a anonciat que fariá apelacion de la decision e demandariá una suspension, çò que permetriá a Atosca de contunhar las òbras a l’espèra de la decision finala. Aquela procedura pòt durar mai d’un an, çò que donariá lo temps de menar lo talhièr a tèrme, coma es previst, a la fin de 2025.

Ara per ara, lo projècte es totalament suspendut, levadas las operacions necessàrias a la seguretat del talhièr, segon lo Ministèri de la Transicion Ecologica.

Una victòria istorica pels militants ecologistas

Per Jean Olivier, president dels Amics de la Tèrra Miègjorn-Pirenèus, es “una victòria immensa .Enfin, una consideracion plena per l’environament! Es la pròva que se pòt pas destruire la biodiversitat sens una rason imperativa e legitima.”

L’annullacion del projècte constituís un precedent istoric. Jamai una infrastructura d’aquela talha èra pas estada arrestada per de rasons environamentalas. “Es una vertadièra tronada”, segon l’avocat especialista en drech de l’environament Arnaud Gossement, que vei aquí una virada dins la gestion dels projèctes d’infrastructuras.

Resta ara de veire se l’apelacion de l’estat capitarà a revirar aquela decision, o se lo projècte A69 demorarà definitivament enterrat.