50 000 personas prenguèron part a la jornada tretzista de Las Vegas sus un terren mai pichon que los costumièrs: 5 mètres de mens en largor e 5 de mens en longor, mas jos un dòme. D’en primièr, Wigan dominèt Warrington: 48-24. Dins la primièra partida NRL, Canberra se mostrèt mai dinamic que los neozelandeses batuts 8-30. La segonda partida entre lo campion Penrith e Cronulla demorèt indecisa fins al final. A la pausa, las Pantèras menavan 12-10 e ajustavan dos ensages transformats tre la represa. Las Làmias tornavan a 22-24, mas Penrith ajustava un ensag per ganhar 28-22. Entre las doas partidas, las Jillaroos australianas se mostrèron sens pietat per las anglesas qu’encaissan un 90-4.

La jornada d’aquesta segonda venguda als USA es una capitada per l’NRL qu’anóncia lo contracte signat per 5 ans amb Las Vegas.

En mai d’aquela jornada granda, i agèt de torneges de rugbi de IX e una partida entre USA e Grècia: victòria de las estatsunidencas 46-0 e dels grècs 46-10. I deviá aver dos tèstes, mas lo primièr foguèt anullat que de malfatans avián raubat lo coire necessari a l’esclairatge de l’estadi previst!

Las autras partidas de la primièra jornada d’NRL se debanaràn de dijòus a dissabte. De notar los rescontres Polets-Bròncos dijòus, Dalfins-Lapinons divendres e Manly-Vaquièrs dissabte.

Los Dragons mai que tristonets

Pel compte de la tresena jornada de la Superliga, los Dragons se desplaçavan a Leigh. Entre fautas individualas e manca de ligam collectiu, los catalans encaissèron 3 ensages per mièg temps per una pietadosa desfaita 6-34 . De veire se los Sang e Aur traparàn una solucion per la venguda de Leeds a Brutus aqueste dissabte. Aqueste dimenge, los Rinoceròsses recebián Castleford e ganhavan 38-24.

La sason serà longa per Salford que coneis tanben una tresena desfaita: 0-42 a Hull KR. Un tombat dins las darrièras minutas permet a Hull FC de ganhar a Huddersfield 11-10. Saint-Helens va batre Wakefield 26-6.

En Championship, aqueste dissabte 8, lo Tolosa Olimpic reçauprà los Taures de Bradford. Lo 22 de març, la mièja finala de Copa Carcassona Albi precedirà la partida TO-Hunslet.

Super-XIII: batèstas per las plaças qualificativas

Lesinhan demòra en corsa per la qualificacion per las fasas finalas amb una victòria bastida dins lo segond temps fàcia a Vilafranca: 34-14. Vilanòva visa tanben la seisena plaça aprèp una corta victòria arrancada suls Dragonets 28-24. Avinhon signa amb dificultat una tresena victòria en seguida fàcia al TO: 20-18.

A l’Agulha, Limós recebiá los pianencs, Los 2 clubs an en vista una plaça de quatren per jogar lo barratge a domicili. Los locals prenon lo larg dins lo segond temps sens empachar los catalans de tornar partir amb lo punt de bònus defensiu (30-18). A Sent Gaudenç, Carcassona marca un ensag dins la prolongacion per batre amb plan de dificultats los Orses 24-20.

Al programa de la 17a jornada, se jogaràn:

• aqueste dissabte 8: CarcassonaAvinhon;

• dimenge 9: Tolosa-Vilanòva; Vilafranca-Limós; Pià-St Gaudenç; Dragonets-Albi.