L’increment de toristas qu’an vesitat Aran en agost s’explicariá per una solidaritat amb lo país, après las fòrtas inondacions de junh que provoquèron de fòrts damatges en Aran, Comenge e Bigòrra. Aital o disiá diluns passat lo sindic d’Aran, Carlos Barrera, a Europa Press. “Auem detectat damb tota claretat qu’apuprètz 15% deth torisme que mos a visitat, sustot en aguest mes d’agost, en que s’a vist mès activitat, ac a hèt damb ua mentalitat solidària”, çò afirmèt lo sindic. “Èm fòrça arregraïts ara responsa qu’es visitants an agut damb era val, ei estat sensacionau”, çò apondèt.
 
Pel sindic, al delà de la climatologia e del desir de fòrça toristas de cercar de temperaturas mai agradivas, fòrça mond an causit Aran per solidaritat e per la crida que lo Conselh General d’Aran a fach al sector toristic sus la recuperacion del país.
 
“Er esfòrç entà dubrir totes es pistes forestaus a fin de junhsèga e eth messatge de normalitat enes carretères a dat es sòns fruts”, çò apondèt.
 
Barrera precisèt que lo nombre de vesitaires en julhet es estat leugièrament inferior a l’enregistrat en julhet de 2012, del temps qu’en agost lo nombre de vesitaires a crescut de manièra considerabla.
 
Lo burèu de torisme de Vielha calculèt l’ocupacion ostalièra de la setmana passada en Aran a 64%. L’an passat foguèt de 57%.
 
Mas las doas setmanas intermediàrias d’agost son las mai remarcablas. Del 5 a l’11 d’agost, mai de 70% de las plaças de las ostalariás èran plenas, 20% de mai qu’arunan; del temps que del 12 al 18 d’agost, las ostalariás del país èran plenas a 70,4%, çò es, un pauc mai de 3% qu’en 2012.