La popularitat de Nadau qu’ei incontestabla, e un còp de mei, aquò que’s demostrè pendent un concèrt dens lo cabdulh francés. Lo Gran Rex que s’empleè de mei de 2700 espectators qui aprecièn las cançons e que’s deishèn emportar per l’atmosfèra bearnesa qu’ac envadiva tot. En efèit, Joan de Nadau, per la soa musica, que transmet l’amor qui pòrta entà la soa tèrra, las soas rasics e la soa lenga. E dens un concèrt de Nadau, lo public ne pòt pas escapar ad aqueths principis, au contrari, que’us reclama eth medish. Qu’ei çò qui’s viscó e ressentí dens la celèbra sala parisenca lo 27 de heurèr.

Nadau qu’ei un grop plan establit sus la scèna occitana, dab detzenats de concèrts cada annada qui passan las frontèras gasconas. Mes aqueths concèrts a París que son especiaus entau grop. N’ei pas lo prumèr còp que conquistan la scèna parisenca, plan au contrari, puishqu’an ja empleat mantun còp la sala de l’Olympia, amb la medisha facilitat qu’emplen lo Zénith de Pau. Dab aqueths concèrts, Nadau que’ns mòstra que hè dilhèu besonh d’anar dinc a la capitale entà demostrar la fòrça qui possedeish enqüèra la cultura occitana e la ferma volontat de la preservar, pr’amor que malaürosament, çò que’s passa pas a París a pauc d’impacte.

Totun, Nadau que s’i escad a transformar aqueths concèrts en ua demostracion transgressiva d’ua Occitània que’s estada istoricament redusida au silenci per la vergonha. Au demiei deus espectators dens las pumèras rengadas que’s trobava François Bayrou, cònsol màger de Pau e purmèr ministre de França. Qu’èra estat convidat per Nadau e que declarè qu’avèva pas mancat nat deus concèrts deu grop bearnés a París: «Quan los s’enten cantar, qu’ei lo país qui canta dab los sons mei grans poètas e los sons mei grans musicians», ce disó a BFM TV.

En esperant, Nadau que contunha d’emplear los concèrts qui balha dens lo país, l’annada deu son 50u anniversari. Infatigables, a hèra annadas enqüèra!