La situacion politica actuala en França, amb un govèrn dirigit per François Bayrou, es marcada per de circonstàncias jamai vistas jos la Va Republica. En 2024, las eleccions legislativas produguèron una Assemblada Nacionala prigondament fragmentada, una configuracion que menèt a la formacion d’una coalicion pòstelectorala inedita entre lo blòc macronista e lo partit conservator Los Republicans (LR).

Segon The Conversation, l’abséncia de majoritat absoluda e de programa comun entre los membres d’aquela coalicion genèra d’instabilitat politica. La gestion de l’executiu, malgrat qualques marges de manòbra, demòra constrenhenta. Las relacions dins lo govèrn, sustot entre François Bayrou e los autres membres, demòran tibadas, coma ne testimònia la fragmentacion de las candidaturas a Boulogne-Billancourt en febrièr de 2025. Las tensions entre los partenaris “forçats” del govèrn se traduson per un clima de desfisança e de desacòrdis vesidors a l’Assemblada, sustot pendent las deliberacions budgetàrias de l’auton 2024.

Jos la Va Republica, e mai de govèrns en minoritat ajan ja existit, coma en 1988 o 2022, la situacion actuala es particularament complèxa. Dins lo passat, aqueles govèrns capitèron a foncionar malgrat l’abséncia de majoritat absoluda, mas la fragmentacion politica es uèi fòrça mai prononciada. Aquela division acrescuda entre los partits fa venir la formacion de coalicions establas mai dificila. En comparason, dins d’autres païses europèus coma Alemanha o Belgica, las coalicions pòstelectoralas son correntas, sustot a causa de la representacion proporcionala, e permeton de formar de majoritats après las eleccions. Pasmens, en França, aquela configuracion es nòva e crèa un desfís suplementari pel govèrn en plaça.

Lo govèrn Bayrou, malgrat l’adopcion de qualques tèxtes legislatius, es limitat dins sas accions per la manca de sosten clar e estable. Lo recors al 49.3, que permet de far passar los projèctes de lei sens debat parlamentari, rèsta un avantatge, mas es pas una garentida de bona capitada. Los marges de manòbra del govèrn son restrenches, e cada decision a d’èsser negociada amb suènh per manténer los equilibris fragils dins la coalicion. La pression de las oposicions ideologicament opausadas entre elas, sustot los neofaissistas de l’RN e lo centresquerrista PS, complica encara mai la situacion.

Dins aquel contèxt, lo sistèma politic francés sembla d’intrar dins una fasa nòva, ont los govèrns minoritaris e las coalicions pòstelectoralas poirián venir la nòrma. Aquò remet en question lo foncionament tradicional de la Va Republica e poiriá, a tèrme, aflaquir la centralitat de l’eleccion presidenciala.