Lo tribunal d’Albi prononcièt, lo dijòus 6 de març de 2025, una pesuga senténcia contra la directritz de l’Escòla Superiora Occitana (ÈSO) d’Albi, reconeguda colpabla d’aver enganat sos estudiants en lor balhant de falses diplòmas. Condemnada a tres ans de preson, amb un relambi probatòri, deurà tanben pagar 550 000 èuros a las victimas.

Una engana que toquèt 90 estudiants.

Dins lo jutjament, lo tribunal establís que 90 estudiants sus dos campus diferents, a Albi e a Narbona, foguèron victimas d’aquela fraudariá de 2020 enlà. Lo jorn del procès, una trentena d’eles èran presents per assistir a la decision de justícia.

La directritz de l’ÈSO, acusada d’escrocariá, defendèt sa postura en decembre passat pendent son procès. I afirmèt qu’aviá pas jamai volgut enganar los estudiants, evocant una “situacion temporària”. Mas los jutges considerèron qu’aquela defensa èra pas valida.

La procuraira aviá demandat tres ans de preson, amb un relambi probatòri, e la pena renduda es confòrma a la demanda del ministèri public.

Falsas diplòmas e promessas enganivas

De 2020 enlà, l’ESO anonciava a sos estudiants qu’obtendrián un diplòma de bachelor e una carta professionala a la fin del cursus. Mas en realitat, lo diplòma correspondiá pas a un bac+3, mas sonque a un bac+2, çò que fasiá que los diplomats èran pas qualificats per certans mestièrs de l’immobilièr.

L’escrocariá foguèt revelada per una estudianta enganada, qu’aviá capitat a descobrir la vertat e n’aviá parlat a sos camaradas. Fòrça d’eles avián patit de grèvas consequéncias moralas e financièras après aver investit de temps e d’argent dins una formacion que lor ofrissiá pas las perspectivas esperadas.

Amb aquesta decision de justícia, la directritz es durament sancionada, e l’ÈSO es descreditada, daissant una trentena d’estudiants en plena incertitud per lor avenidor professional.