Actualitats
Narbona: de mèdias occitans e catalans s’amassan per trabalhar ensems
La Declaracion de Narbona demanda mai de sosten de las institucions als mèdias de proximitat e s’engatja a refortir las sinergias
Tèxte legit
Los 7 e 8 de març de 2025 passats, Narbona aculhiguèt lo 1r Rescontre de mèdias de proximitat d’Occitània e en catalan, un eveniment que reüniguèt près de 150 participants. L’amassada serviguèt de plataforma per abordar de tèmas crucials per l’avenidor dels mejans de comunicacion locala e regionala. L’eveniment, —organizat per l’Associacion dels Mèdias d’Informacion e Comunicacion (AMIC) e l’Assemblada Regionala de Ràdios Associativas (ARRA)— faguèt participar los principals representants de mèdias occitans e catalans, aital coma de creators de contenguts e d’influenciaires.
Pendent las jornadas, se debatèt divèrsas questions d’importància estrategica coma sarrar lo jove public dels mèdias de proximitat, dinamizar las lengas catalana e occitana dins los mèdias, trobar de nòus aisses de collaboracion entre mèdias, que sián en papièr o numerics, de ràdios o de televisions de proximitat.
Un dels ponches culminants de l’eveniment foguèt la presentacion e aprobacion de la Declaracion de Narbona, un document que soslinha lo ròtle crucial dels mèdias de proximitat dins la societat contemporanèa. La declaracion met en valor l’importància d’aqueles mèdias dins la creacion e difusion de l’informacion engatjada amb lo malhum social, cultural, esportiu e economic local.
La Declaracion de Narbona demanda mai de sosten de las institucions als mèdias de proximitat, s’engatja a refortir las sinergias entre mèdias de territòris vesins, a partejar d’experiéncias per melhor aténher los ciutadans, a desvolopar d’espleches per atraire e engatjar los joves, a trabalhar en de projèctes comuns per refortir nòstres mèdias e integrar la joventut dins aqueles mèdias per facultar lors continuitat e desvolopament.
La declaracion reconeis tanben los enjòcs tecnologics e socials que los afrontan los mèdias de proximitat e prepausa la collaboracion transfrontalièra coma aisina eficaça per los abordar.
Aquela amassada, inspirada pel Congrès Interpirenenc dels Mèdias de Proximitat de 2019, marca una primièra estapa dins la collaboracion transfrontalièra entre mèdias occitans e catalans, en establissent las basas de futuras iniciativas conjonchas.
💬 Tanquem l'acte amb la taula rodona sobre vincles entre els joves creadors de contingut i els mitjans de proximitat. Amb @HolaMariola@elisabetaloy@p_mallorquins@paisinvisible i Lo Ligam pic.twitter.com/meRQT2nop3
— AMIC (@amic_acpg) March 8, 2025
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari