Del 17 al 21 de març de 2025, lo licèu Jules Supervielle d’Auloron aculhirà la Setmana de las Lengas Vivas, qu’arriba ongan a sa desena edicion jol lèma “Lengas entà crear, innovar e s’engatjar!”. L’occitan, amb l’alemand, l’anglés e l’espanhòl, serà una de las lengas valorizadas dins aquela celebracion, que comprendrà d'activitats divèrsas per sensibilizar los estudiants a las lenga e cultura occitanas.

Pendent la setmana, cada jorn a la pausa de miègjorn, se farà d'animacions amb la participacion d’expèrts e professionals del sector. Diluns 17 de març, Maud Puech, de l’Ofici Public de la Lenga Occitana (ÒPLO), presentarà lo prètzfach de promocion e ensenhament de l’occitan que mena a bon tèrme aquela institucion. Dimars 18, Rémi Berdou, del CIRDÒC, ofrirà un obrador sul patrimòni immaterial e introduirà los escolans a l’enquista etnologica a travèrs d’un estúdio de podcast.

Lo dimècres 19 de març, lo musician Romain Baudoin farà un concèrt e parlarà de sa recèrca sus la tradicion musicala de las Lanas de Gasconha, e mai de sa futura residéncia artistica a l’Espaci Jeliote d’Auloron. Dijòus 20, Aure Séguier, del Congrès Permanent de la Lenga Occitana, mostrarà d’aisinas numericas pel tractament automatic de la lenga coma lo traductor Revirada e lo sintetizaire vocal Votz.

Enfin, lo divendres 21 de març, Ludovic Gillet e Laurent Labadie, de Conta’m, faràn un obrador de doblatge en occitan del filme Paddington, ofrissent una experiéncia practica e ludica als escolans.

Aquelas activitats, dobèrtas a totes los escolans del centre, an per tòca de promòure las lenga e cultura occitanas e de mostrar lors aplicacions professionalas e creativas. La setmana es possibla gràcias al sosten del director e de la còla del licèu, aital coma a l’ajuda dels escolans de l’opcion d’occitan LVC e de lor professora Estela Comellas.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com