Amb lo mes de març, ven lo temps ont lo/la tretzista sap pas pus ont virar lo cap amb totas las competicions en cors: dels campionats locals a l’NRL en passant per l’Elèit 2, lo Super-XIII, lo Championship e de rendètz-vos internacionals masculins o femenins sens doblidar los torneges de las escòlas de rugbi (coma lo Challenge Grégoire, dimenge 23 de març a Carcassona)!

NRL: la granda rintrada

Aprèp las doas partidas de Las Vegas, la primièra jornada de la sason 2025 d’NRL se perseguissiá de dijòus a dimenge.

Dijòus, los Cavals Fòls de Brisbane signavan 9 ensages per balhar la leiçon als Polets de Sydney: 50-14. Divendres, Newcastle anava batre los Tigres de l’Oèst: 10-8. Los Lapinons tornavan trapar Wayne Bennet coma entraïnaire aprèp son passatge cò dels Dalfins e los Lapinons dominan los Dalfins: 16-14. Dissabte, los Dògols ganhan cò dels Dragons: 28-20. Los Vaquièrs son puslèu inexistents cò de las Aglas de Manly: encaissan 7 ensages e pèrdon 12-42.

Dimenge, a Melbourne, la Tempèsta estrilha las Anguialas 56-18.

Superliga: quatrena victòria per Hull KR e primièra pels Dragons

Dijòus, pas de venceire entre Hull FC e Leigh: 22-22. Divendres, Hull KR signa sa quatrena victòria en ganhant cò de St Helens 20-10 alara que Castleford bat Salford 22-14.

Dissabte, los catalans recebián Leeds. Las doas formacions prepausèron un jòc estequit. Sus la còrna del repaus, Keary dobriguèt la marca amb un tombat. Dins lo segond temps, los Sang e Aur puntèron dos ensages en seguida de palmas mal contrarotladas pels adversaris. Primièra victòria de la sason pels Dragons 11-0 que reçaupràn dissabte la formacion de Championship de Featherstone pel compte dels ueitens de la Cup.

Dimenge, de resultas diferentas pels viatjaires de Las Vegas: Wigan menat a la pausa accelèra dins lo segond temps ont marca 34 punts sens ne’n encaissar un e bat largament Huddersfield 44-18 alara que Warrington subís sus sa pelena la lei de Wakefield: 16-30.

Championship: passejada tolosana

En Championship, aqueste dissabte, lo TO recebiá los Taures de Bradford. Los occitans menan 10-0 a la pausa per véncer largament 36-4.

Dissabte 22 de març, lo TO reçauprà Hunslet aprèp una partida de dobertura de tria: la mièja finala de Copa entre Carcassona e Albi.

Super-XIII: Carcassona torna prene lo cap del classament

Dissabte, Carcassona signèt 9 ensages per emportar la partida fàcia a Avinhon 46-16.

Dimenge, en rason de las condicions meteorologicas, Pià-St Gaudenç se joguèt pas. Vilafranca demòra mèstre a l’ostal fàcia a Limós: 22-16, e Vilanòva va ganhar a Tolosa: 32-16. A St Estève, los Dragonets avián fait davalar Yaha, Rougé e Maria de l’esquipa primièra per reçaupre Albi que baton 20-14.

Pel compte de la 18a jornada, se jogaràn las partidas:

• Dissabte 15 de març: Dragonets-Tolosa; Avinhon-Pià; St Gaudenç-Vilafranca; Albi-Lesinhan.

• Dimenge 16: Vilanòva-Carcassona.