CMA CGM, lo gigant francés del transpòrt maritim, a anonciat un investiment de 20 miliards d’èuros als Estats Units, çò rapòrta La Dépêche du Midi. Aquela novèla es estada oficializada dins lo Burèu Oval pel president Donald Trump el meteis, en preséncia del president-director general de l’entrepresa Rodolphe Saadé. L’investiment serà destinat a la bastison d’infrastructuras e de terminals logistics pel transpòrt maritim, çò que crearà 10 000 emplecs als Estats Units dins las quatre annadas venentas.

Un dels principals objectius d’aquel investiment es d’aumentar lo nombre de naus jos pabalhon estatsunidenc. A l’ora d’ara, CMA CGM esplecha 10 vaissèls jos aquel pabalhon, mas l’entrepresa prevei d’espandir aquela flòta a 30 naviris. Saadé, dirigent reputat pròche de Macron, a exprimit son estrambòrd per aquel projècte, esperant qu’a mesura que s’assolidarà, l’investiment poirà créisser dins las annadas avenidoiras.

Aquel movement interven dins un contèxt de tensions comercialas, amb un aument de las taxas d’importacion instaurada per Trump, çò que poiriá influenciar las estrategias d’autras entrepresas internacionalas. CMA CGM, dont la sedença sociala es a Marselha, es lo primièr armator francés e lo tresen pus grand del Mond, après MSC (Soïssa) e Maersk (Danemarc), e contunha d’estendre sa preséncia a l’escala mondiala.

CMA CGM es un acronim de las doas entrepresas predecessoras, la Companhiá Maritima de Naulatge (CMA segon la sigla en francés) e la Companhiá Generala Maritima (CGM), que fusionèron en 1999.