Una novetat dinamica e engatjada arriba per donar una visibilitat mai granda a la creacion en occitan. “Lo Mercat” es una plataforma en linha pensada per facultar la compra e la venda de produches que fan viure las lenga e cultura occitanas dins la vida vidanta.

Los creators del sit dison d'aver constatat la dispersion dels afogats de l’occitan e la dificultat per trobar de produches culturals en lenga nòstra. Sovent, per crompar a de creators occitans, cal cercar longtemps o assistir a d’eveniments occitanistas. L’accès a aqueles produches es tanben inegal, mai que mai pels locutors qu’abitan dins d’airals rurals isolats. Per aquela rason an aguda l’idèa de crear una botiga en linha.

“Lo Mercat” permet als creators, artisans, associacions e marcas occitanas de vendre lors produches dins un encastre clar e professional, accessible a totòm dins lo Mond entièr.

“Lo Mercat” se destria per sa capacitat de s’adaptar a cada creator, en prepausant diferentas opcions per gerir las vendas e l’expedicion segon los besonhs de cadun. L’accès a la plataforma se fa per mejan d’una adesion, amb de comissions aplicadas segon l’opcion causida, per cobrir los servicis provesits.

Amb l’ambicion de venir lo referent de la creacion occitana en linha, “Lo Mercat” trabalha tanben per desvolopar de campanhas de promocion e cercar de partenariats per espandir la visibilitat dels creators en Occitània e endacòm mai,

Fin finala, “Lo Mercat” es mai qu’una simpla plataforma de venda: es un movement qu’amassa de creators e de consumaires per far viure las lenga e cultura occitanas. Cada crompa es un gèst concret per sosténer l’economia culturala occitana, encoratjar la creacion e ajudar los creators a viure de lor passion.

Per ne descobrir mai e jónher aquela aventura, vesitatz lo sit lo-mercat.com.