Los sindicats del conselh departamental de Nauta Garona se tròban dins l’impossibilitat de comunicar amb los salariats per corric. L’institucion a decidit de suspendre las adreiças electronicas sindicalas, en pretendent que los messatges transmeses èran “ansiogèns” e poirián portar tòrt al moral dels agents.

Dins una letra mandada als representants dels sindicats, lo director general dels servicis explica la motivacion de la mesura: “Constatant l’impacte sus la santat e la seguretat dels agents de la multiplicacion de messatges ansiogèns enviats a tota la collectivitat, lo president del conselh departamental a decidit de suspendre provisòriament lo mandadís de messatges de las adreiças sindicalas estant.”

Una decision incomprensibla pels sindicats

Pel front sindical unitari, aquela decision es una vertadièra censura e una ataca contra la libertat sindicala e lo dialòg social. “Es un còp de maçuga. I a fòrça colèra e incompreneson. Sentèm una vertadièra omertà en aqueste moment”, çò fisa una font anonima a França3.

Dins un comunicat, los sindicats anóncian lor intencion de menar l’afar davant la justícia administrativa per far respectar lors dreches. “Es una practica qu’avèm costuma de veire dins lo privat, mas jamai nos seriam pas esperats a aquò dins una collectivitat qu’a per vocacion lo social. Aquò es pas democratic!”,çò planh Cédric Caubère, secretari de l’union departamentala de la CGT 31.

Un clima social ja degradat

Los sindicats denóncian que lo malaise es prigond dins la collectivitat dempuèi l’anóncia d’un plan d’austeritat que prevei la supression de 450 pòstes, e lo non-renovelament de fòrça contractuals..

“Los dreches d’alèrta se multiplican dins totes los servicis. D’agents vivon mal la fin dels contractes dels collègas e se demandan cossí van poder contunhar de far lor trabalh dins de condicions acceptablas. Lo climat ansiogèn ven pas dels corrièrs dels sindicats, mas de la situacion reala!”, çò soslinha Cédric Caubère.

Segon el, lo conselh departamental vòl “copar lo termomètre per far davalar la fèbre”. “Mas es pas en nos empachant de comunicar que la contèsta va desaparéisser!”, çò avertís lo sindicalista.

Lo conselh departamental justifica sa decision

En responsa, lo conselh cepartamental explica que “dempuèi mantun mes, las organizacions sindicalas multiplican los mandadisses de corrics d’un biais abusiu”. Pel sol mes de febrièr, “58 messatge foguèron enviats als agents”, çò precisa l’institucion, qu’accusa los sindicats de difusar de “donadas erronèas”.

Mantun agent auriá senhalat lo caractèr ansiogèn d’aqueles messatges, considerant qu’”empachan de trabalhar dins la serenitat”.

Una manca de dialòg?

Hugues Bernard, representant del personal per la CFDT, denóncia una rompedura del dialòg social. “Avèm fach de proposicions per limitar l’impacte d’aqueste plan d’austeritat. Per exemple, avèm suggerit de remplaçar pas 150 retirats dins los tres ans avenidors e d’esparnhar los contractuats mai vulnerables. Mas cap negociacion es pas estada possibla.”

Un recors juridic en preparacion

L’intersindicala CGT-CFDT-SUD-FO a mandat lo dorsièr a un avocat e demanda que lo conselh departamental “meta en plaça de novèlas modalitats de comunicacion numerica que respècten lo drech sindical”.

En esperant aquò, los sindicats pòdon totjorn distribuir de tractes e afichar lors comunicats dins los locals de la collectivitat.