Granda vesprada de XIII aqueste dissabte 22 de març a l’estadi Ernèst Wallon de Tolosa: a 3 oras, la mièja finala de la Copa de França entre Carcassona e Albi e a 6 oras la partida de Championship; Tolosa-Hunslet.

Cup: Wigan eliminat

La gròssa suspresa dels ueitens de finala de la Cup es l’eliminacion del deteneire e 21 còps venceire de la competicion, Wigan, batut sus son èrba per Hull FC: 22-26.

Logicament, los clubs de Championship son batuts pels pensionaris de la Superliga: los catalans amb Sam Tomkins coma arrièr escartan Feathestone 46-18; Salford elimina Bradford: 26-16; Hull KR daissa pas marcar un punt a Oldham 40-0; Leigh bat Batley: 62-4.

Los autres qualificats son St Helens (venceire de Leeds: 22-14), Warrington (que ganha a Widnes: 26-16). Wakefield se va qualificar cò d’Huddersfield: 22-12.

Los quarts de finala se jogaràn la dimenjada dels 5 e 6 d’abril.

Pel compte de la Superliga, aqueste dissabte 22, los Dragons Catalans se desplaçaràn a Castleford sens Artús Morgue que ven de jónher, sens esperar la fin de la sason, Hull KR per tres annadas .

Super-XIII: Avinhon, Sent Gaudenç e Vilanòva se meton en evidéncia

Se jogava la dètz e ueitena jornada del Super-XIII. Los catalans dominèron Tolosa: 44-4, çò que daissa pensar que la meteissa aficha per la mièja finala de la Copa dimenge a Lesinhan nos deuriá pas reservar una granda suspresa quant al nom del finalista.

Lesinhan subís la lei albigesa: 18-38. Los avinhonencs volontaris menan long de la partida e baton Pià 28-22. Sent Gaudenç complica lo desir de qualificacion de Vilafranca en emportant la partida 46-22. Dimenge, Carcassona se desplaçava a Vilanòva amb una formacion rejovenida qu’agèt totes los mals de tornar amb lo punt de bònus defensiu: 18-30. Aquò confirma la possibilitat de qualificacion dels Leopards per las fasas finalas.

NRL: los Polets coma d’aglas

Dijòus, los Cavalièrs de Newcastle meton lo cap dels Dalfins jos l’aiga: 26-12.

Divendres, sul terrenc de Parramatta, al tèrme d’una partida vodada a l’ofensiva amb 12 ensages marcats, 7 pels ganhants e 5 pels perdents, los Polets dominan los campions de Penrith: 38-32. Los neozelandeses son mai fòrts que Manly: 36-16.

Dissabte, Canberra remanda los Cavals Fòls a l’estable: 32-22. Los Lapinons van batre los Dragons d’un punt: 25-24. Los Vaquièrs son engolits per las Làmias: 12-36.

Dimenge, Parramatta subís la lei dels Tigres 6-36 e los Dògols fan plan de misèrias als Titans: 40-24.