Bandièra05 1180x150: PUBLICITAT

Actualitats

InternacionalPolitica

Ongria: enebisson la marcha de las fiertats LGBTQI+

La nòrma proïbís explicitament las reünions que “promògan o exibiscan lo cambiament de sèxe de naissença o l’omosexualitat”, jos l’escampa de protegir lo desvolopament fisic, mental e moral dels menors

Ongria: enebida la marcha de las fiertats LGBTQI+
Ongria: enebida la marcha de las fiertats LGBTQI+ | Momentum

Tèxte legit

Lo parlament ongrés aprovèt dimars un esmendament de la lei de reünion qu’enebís la tenguda de la marcha de las fiertats LGBTQI+, una decision prepausada pel partit ultraconservator Fidesz, del primièr ministre Viktor Orbán. La mesura a recebuts 136 vòtes en favor e 27 contra, refortissent lo contraròtle del govèrn ongrés suls dreches de reünion e d’expression dins lo país, çò rapòrta ElDiario.es.

La nòva lei interditz explicitament las reünions que “promògan o exibiscan lo cambiament de sèxe de naissença o l’omosexualitat”, jos l’escampa de protegir lo desvolopament fisic, mental e moral dels menors. En mai d’aquò, establís de multas contra los qu’organizarián o participarián a una marcha de las fiertats qu’oscillan entre los 6500 e los 200 000 forints (entre 16 e 500 èuros), çò precisa EuroNews. Las autoritats poiràn utilizar de sistèmas de reconeissença faciala per identificar los contravenents, en se basant sus una lei de 2015.

L’oposicion politica e qualques collectius an reagit amb indignacion. Pendent la sesilha parlamentària, de deputats del partit liberal e centrista Momentum protestèron en alucant de bengalas amb las colors de l’arcolan e en mostrant d’imatges critics amb Orbán. Lo pòrtavotz Máté Hegedűs qualifiquèt l’enebicion coma un acte de faissisme e afirmèt que la marcha de las fiertats es un movement que se pòt pas far calar.

La Comission Europèa a condemnada la decision, en soslinhant que manca als dreches fondamentals de libertat d’expression e de reünion pacifica, de valors essencials dins l’Union Europèa. Hadja Lahbib, comissària europèa encargada de l’egalitat, exprimiguèt son sosten a la comunautat LGBTIQ+ e soslinhèt qu’aquela interdiccion representava un atac contra la dignitat e los dreches umans.

Aqueste movement fa partida d’una estrategia mai larga del govèrn ongrés per restrénher las libertats civilas, que pertòca pas solament lo collectiu LGBTQI+ mas tanben de jornalistas, de jutges e d’activistas. La mesura provòca lo chepic internacional a prepaus de la reculada democratica en Ongria jos Orbán, socialdemocrata convertit a l’ultradrecha.

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Franc Bardòu
2.

En Ongaria, enebisson la marcha de las fiertats LGBTQI+. Non lor demòra mai que la marcha de las vergonhas (al pas de l'auca) davant la diversitat umana qu'es tostemps estada çò qu'es. Fascisme ordinari, o la negacion nècia e sistematica de totas las evidéncias. Plan segur, la famosa Comission Europèa a condemnada la decision, en soslinhant que manca als drèits fondamentals de libertat d’expression e de reünion pacifica, de valors essencialas dins l’Union Europèa. Mas s'aquelas valors son efectivament "essencialas" dins l'Union Europèa, coma o pretendon en corala vertuosa, cossí se fa que los partits d'ultra-dreita siá legals e acceptats ? Cossí se fa que se pòscan presentar a d'eleccions democraticas, contra las democracias ?

  • 2
  • 2

Escriu un comentari sus aqueste article