Cada annada, a partir del mes de genièr, los calandrons començam la preparacion del carnaval. Causissèm un tèma en ligam amb l’actualitat e decidissèm amassa del nom de Sénher Carnaval. Per aquela annada, avèm causit de debatre a l’entorn del progrès. En classa, avèm estudiat sa definicion, son interès e sos enjòcs. Foguèt l’escasença de parlar de l’evolucion de l’umanitat dempuèi la Preïstòria e d’estudiar las avançadas màgers de nòstra societat. Aqueles tempses de debats permetèron als mainatges de poder escriure un jutjament presidit per dos jutges, dos avocats, una grafièra e una multituds de testimònis que poguèron siá defendre lo progrès, siá lo condemnar. En parallèl, preparèrem los costums, creèrem nòstre òme carnaval que per aquela annada s'apelava «Sénher Progrestrèm». Aquí perqué, lo dimècres 12 de març a 14h30, totes los mainatges de la vila de Limós poguèrem desfilar jos las arcadas de la Plaça de Republica e assistiguèrem al jutjament de Sénher Progrestrèm que foguèt condemnat sens apelacion a èsser cremat! Aquel temps fòrt de la cultura locala occitana es esperat amb impaciéncia pels calandrons tre la rintrada escolara e marca lo passatge d’una sason a una autra: lo fuòc que permet a la natura de reprene vida!

Aicí lo testimoniatge d’Emma, CM1, escolana de l’escòla que jogava lo ròtle d’una testimòni de la defensa pendent lo jutjament:

«Se sabètz pas perqué se fa lo jutjament, lo vos vau explicar: cada an, jutjam Sénher Carnaval per clavar lo Carnaval. Se jutja una causa que pòt èsser marrida per la societat o la planeta. Aquí perqué los calandrons de Limós, los correspondents de Carcassona e los CM2 jutgèrem Sénher Progrestrèm lo dimècres 12 de març. Abans lo jutjament, creèrem los desguisaments, èrem en Fecas. Sénher Estève nos venguèt mostrar en classa cossí far las carabenas e descobrir lo costum de la banda dels ancians. Aprenguèrem a dançar la valsa de dobertura e de cantar AdieupaureCarnaval. Aguèrem l’astre d’èsser acompanhats pels musicians oficials del Carnaval de Limós pendent lo desfilat. Èra èxtra de far dançar la carabena e de lançar de confètis!»

Clavarem aquela annada amb lo Carnaval de la Trivala, lo dissabte 29 de març a Carcassona en jutjar un second còp nòstre Sénher Progrestrèm. A l’an que ven!

La classa de l’escòla Calandreta Limosenca

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com