Lo diluns 10 de març, las classas d’occitan e de cinèma del licèu Teofil Rossèl de Sanch Eli d’Apchièr (Aubrac) assistiguèron a la difusion dels primièrs dos episòdis de La Seria al cineteatre de la vila, acompanhats dels collegians occitanistas de 3a del collègi del Naut Gevaudan.

La Seria, primièra seria televisada en lenga occitana, conta l’istòria de Thomas Lebouly e Matthieu Verlhaguet que partisson a l’aventura per realizar una seria que s’apelariá Montsegur de Mar. Aital los vesèm percórrer los países occitans dins una BX en cèrca de finançament. Se capitaràn ben dins lor entrepresa de far una seria dins La Seria?

Per o saupre, caldrà agachar los episòdis seguents…

En tot cas, los liceans poguèron rescontrar Amic Bedel, realizaire, e Estela Blenet, actritz e assistenta camèra sul rodatge. Aprèp la projeccion, poguèron intercambiar amb eles e èran curioses de tot!

Dins l’aprèp-miègjorn, participèron a d’obradors d’escritura e d’intercambis sus La Seria e tanben sus un projècte novèl que son a escriure los realizaires.

En cinèma, los liceans de 1a especialitat CAV poguèron metre sas coneissenças a profièch en escrivent una sequéncia de seria a partir d’un projècte que lo realizaire es a escriure d’aquesta passa.

En occitan, poguèron prene la paraula per explicitar son sentit, parlar dels personatges e de las vilas emblematicas occitanas coma Tolosa, Seta e Marselha, o de Barcelona, diferents luòcs de rodatge de La Seria.

Puèi imaginèron çò que poiriá èstre Montsegur de Mar, aquí las idèas manquèron pas, faguèron pròva d’imaginacion! Lo tot en lenga e a l’oral!

Mercé al CIRDÒC e a Joana Maria Vazelle qu’a permés la realizacion d’aquel projècte de rescontre entre de professionals del mond del cinèma occitan e los liceans de nòstre licèu.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com.