Lo domeni Jeanjean, situat a Sant Feliç de Lodés (Lodevés), a patit de grands degalhs après un incendi violent qu’esclatèt dimars 18 de març a 18 oras. 80 pompièrs intervenguèron per conténer lèu las flamas. A 20 oras, lo fuòc èra ja mestrejat, mas la mitat de l’airal d’estocatge èra partida en fum.

Los pompièrs del departament d’Erau metèron dos oras per véncer l’incendi. Malgrat la rapiditat, los degalhs son considerables: 800m² del bastiment d’estocatge son totalament destruches. Lo bilanç inicial èra encara pièger, amb 2000m² potencialament tocats. Lo fustatge, fragilizat pel sinistre, s’es afondrat.

Segon lo luòctenent-coronèl Bonnafous del SDIS d’Erau, la botiga e lo musèu del domeni an pogut èsser salvats. Ça que la, la teulada, en partida destrucha, representava un perilh pels socorses. Per assegurar la seguretat dels soldats del fuòc, un robòt foguèt utilizat.

L’incendi es ara completament escantit. La pluèja ajudèt a reduire lo dispositiu de susvelhança. Calguèt realizar de mesuras termicas lo matin seguent.

L’Ostal Jeanjean es un dels mai grands domenis viticòlas de l’encontrada e del departament. La familha es implantada a Sant Feliç de Lodés dempuèi 1872.

Brigitte Jeanjean, proprietària del domeni, explica que de desenas de milièrs de botelhas son estadas destruchas. Èran de vins qualitoses, destinats essencialament al comèrci, a las ostalariás e als restaurants.

Lo domeni viticòla demòra tampat al public. Las muralhas, fragilizadas pel fuòc, riscan l’afondrament.