Lo procès dels 16 caçaires implicats dins la mòrt de l’orsa Caramelles en 2021 en país de Fois arriba a la fin. Entre eles, lo caçaire autor del tir risca quatre meses de preson amb relambi.

Las associacions reclaman de reparacions

Durant la segonda jornada del procès, lo tribunal correcional de Fois entendèt las parts civilas. Las associacions ecologistas e de defensa dels animals reclaman de compensacions per la mòrt de Caramelles, tuada après una ataca durant una batuda al singlar.

L’avocat de l’ASPAS (Associacion per la Proteccion dels Animals Salvatges), François Ruffié, denoncièt las “imprudéncias e negligéncias” dels caçaires. Recordèt quèran “gardians de la biodiversitat” e que “degun a pas d’ignorar la lei e los limits de la resèrva”. Caramelles èra estada tuada a 400 mètres de la zòna de caça autorizada, dins la resèrva del mont Valièr.

La defensa demanda la relaxa

De son caire, lo caçaire acusat, un retirat d’81 ans, expliquèt qu’èra estat atacat per l’orsa e qu’aviá pas agut d’autra opcion que de tirar. Malgrat aquò, lo procuraire requeriguèt quatre meses de preson amb relambi, acompanhats d’una interdiccion de portar una arma pendent dos ans, la confiscacion de sas armas, lo retirament del permés de caça pendent dos ans e una emenda de 300 èuros.

Pels autres quinze caçaires, lo procurador demanda la suspension dels permeses de caça entre uèch meses e dos ans, amb un total de 13 900 èuros de multa.

De milièrs d’èuros reclamats per la mòrt de l’orsa

Las associacions de defensa de la fauna demandan elas una reparacion del prejudici environamental, estimada a 467 000 èuros. Una de las partidas civilas reclama 175 000 èuros per cobrir lo còst d’una reïntroduccion d’orsa, e una autra associacion demanda 100.000 èuros suplementaris.

Los demandaires insistisson tanben sul fach que l’estat deu respectar sos engatjaments en lançant de nòvas reïntroduccions per remplaçar los orses tuats pels òmes, que son ja quatre dempuèi 2020.

Verdicte lo 6 de mai

Per quant a ela, la defensa denóncia una manca d’informacion de part dels servicis de l’estat, qu’aurián degut avertir los caçaires de la preséncia de l’orsa. L’avocat Charles Lagier reclama doncas la relaxa pels acusats.

Lo tribunal de Fois rendrà sa decision lo 6 de mai de 2025.