L’estat francés es uèi la segonda poténcia mondiala dins l’indústria de l’armament, un sector estrategic que recampa d’actors de dimensions mondialas e que poiriá prene una dimension novèla amb lo plan de rearmament que l’Union Europèa es encara a desvolopar. Dins aquela indústria, Occitània jòga un ròtle màger, puèi qu’aculhís las segonda e tresena regions de l’estat francés mai implicadas: Provença-Alps-Còsta d’Azur (PACA) e Nòva Aquitània. La primièra es l’Illa de França.

Nòva Aquitània es un pòl de produccion d’armament immancable. Segon Sud-Ouest, la region es un dels centres mai importants de l’armada francesa, amb mai del 10% de sos efectius militars sortits de sa populacion. Es tanben la tresena region en tèrmes d’implantacion de las indústrias d’armament, çò que representa mai o mens 40 000 emplecs dirèctes dins los sectors de l’aeronautica, de l’aeroespaciala e de la defensa.

D’entrepresas far coma Dassault Aviacion i an lor sèti pel desvolopament e per la concepcion de l’avion de combat Rafale, emblematic de l’indústria militara francesa. La concepcion d’aquel aparelh se fa a Biàrritz (Bas Ador) e Martinhàs (la Grava), abans que siá assemblat a Merinhac (la Grava). D’autre caire, Thales, Exosens, Roxel e Safran fan tanben part dels gigants de la defensa presents dins la region, en particular a Merinhac e sos alentorns.

De son costat, la region dicha Provença-Alps-Còsta d’Azur (PACA) ocupa tanben una plaça de primièra importància dins lo sector de la defensa, especialament la navala. Abriga, per exemple, lo pòrt militar de Tolon, principal sit de la marina estatala francesa. Aquel pòrt es non solament un centre neuralgic per la flòta, mas tanben un luòc estrategic per la construccion e la mantenença de vaissèls militars. Lo 8% de la populación activa de Tolon èran en 2020 de militars professionals.

La region abriga tanben Airbus Elicoptèrs a Marinhana (País Marselhés), un dels màgers productors d’elicoptèrs militars. MBDA, fabricant de missils, i es tanben implantat, assolidant  lo ròtle de Provença coma un pilar de l’armament, sustot dins los domenis naval e aeronautic.

Enfin, Tolosa es tanben una vila estrategica per l’indústria aeronautica e militara de França. Airbus, lo gigant europèu de l’aeronautica, a sa sedença aicí, amb de linhas de produccion consagradas als avions civils e militars. L’aeronautica militara es al còr de l’economia tolosana, en particular amb la produccion d’avions de transpòrt militars, de drònes e d’autres esquipaments per la defensa. Tolosa representa aital un pilar essencial de la defensa a l’escala mondiala.