Copa: los Tigres se qualifican al punt en aur

Es una partida de tria (lo sit Treize-Mondial parla d’antologia!) que prepausèron Canaris de Carcassona e Tigres d’Albi aqueste dissabte 22 de març a l’estadi Ernèst Wallon. A la 80a minuta, las doas formacions se trapavan a egalitat 30-30. Tòni Gigòt, que veniá de mancar tres tombats, intercerptèt una passa azardosa carcassonesa per anar puntar l’ensag de la qualificacion: 34-30.

La Copa senhorejava dins los locals de Carcassona XIII dempuèi 2019: victòria fàcia als Dragonets 22-6, puèi 3 sasons sens Copa en rason de la Covid; novèlas victòrias de Carcasona en 2023 (38-12 fàcia a Albi) e 2024 (22-6 fàcia a Lesinhan).

En finala, dissabte 5 d’abril de vèspre a Narbona, los albigeses rescontraràn los Dragonets qu’an conegut mai de dificultats que previst per batre Tolosa a Lesinhan: 16-0.

En dobertura, la finala de la Copa Nitard (U-19) opausarà Tolosa (venceire d’Albi en mièja finala: 26/16) e los Dragonets qu’an escartat Lesinhan (24/12)

En partida en retard del Super-XIII, dissabte, Pià a batut largament St Gaudenç: 54-12.

Al programa de la 19a jornada:

• dissabte 29 de març: lo dèrbi Lesinhan-Limós, Tolosa-Albi, Vilafranca-Avinhon, Pià-Vilanòva

• dimenge 30, a Domèc, una plaça dirècta en mièja finala serà en jòc entre los Canaris e los Dragonets.

Primièra victòria al defòra pels Dragons

En Superliga, aqueste dissabte, los Dragons afrontavan d’autres Tigres: los de Castleford. En signant 4 ensages, jos una pluèja freja e sus un terren enfangassat,los catalans signan lor primièra victòria al defòra de la sason: 26-4. Aqueste dissabte 29, es un talhon bèl que se presentarà a Brutus: St Helens.

Dijòus, Salfòrd aviá signat sa primièra victòria de la sason: 23-10 fàcia a Huddersfield. Divendres, Warrington a St Helens (14-12) e Hull FC (16-12 a Wakefield) s’impausavan al defòra. Dissabte, Leeds gardava l’avantatge sus Wigan: 12-10. Dimenge, Hull KR domina Leigh 30-0.

NRL: novèla desfaita dels campions

En dobertura de la tresena jornada d’NRL, Penrith perdiá lèu dins la partida son menaire de jòc Nathan Cleary (protocòl commocion) e fin finala lo rescontre a Melbourne: 24-30. Divendres, los neozelandeses (14-6 fàcia als Polets) e los Cavals Fòls (26-16 fàcia als Vaquièrs) ganhavan a l’ostal. Çò que fasián tanben, dissabte, las Làmias (27-12 fàcia als Lapinons) e los Titans (26-6 fàcia als Cavalièrs) alara que los Tigres anavan batre los Dalfins: 30-18.

Dimenge, las Aglas de Mar estrilhavan Canberra 40-12 e los Dògols ganhan cò de las Anguialas: 16-8.

Lo calendièr dels XIII de França

Dins una entrevista a L’Indépendant, l’entraïnaire dels Blaus, Laurenç Fraissinós, anóncia que lo XIII de França jogarà sa participacion a la Copa del Mond de 2026 sus una sola partida fàcia a Jamaica lo 25 d’octobre a Albi. Es possible que los Cangorós fagan una estapa en França abans d’anar jogar 3 tèstes en Anglatèrra. França B poiriá rescontrar los Knights (esquipa B anglesa) e los Coalas (estrangièrs del campionat). Los U17 rescontraràn dos còps los angleses e los U19 aniràn als antipòdes. Los programas femenins e XIII-cadieral demòran d’establir.