Actualitats
Danemarc avertís los transgenres abans que vesiten los Estats Units
Lo país escandinau met en gàrdia los viatjaires transgenres que se’n van als Estats Units, lor aconselhant de verificar lor estatut abans la partença a causa de las politicas discriminatòrias de l’administracion Trump
Tèxte legit
Lo ministèri danés dels afars estrangièrs a actualizat sas recomandacions per las personas transgenres que se’n van als Estats Units, après d’inquietuds levadas per las politicas novèlas de l’administracion Trump, çò rapòrta Le Monde. Dins una anóncia facha lo 21 de març, aconselhava a las personas transgenres de verificar lor estatut al près de l’ambaissada estatsunidenca abans de partir, sustot se tenon un passapòrt que mençone un genre “X” o un cambiament de sèxe enregistrat. «S’avètz la mençon de genre X sus vòstre passapòrt o s’avètz cambiat de sèxe [sus vòstre estat civil], es recomandat de contactar l’ambaissada estatsunidenca abans lo viatge per confirmar las règlas aplicablas», çò precisèt la diplomacia danesa.
Dempuèi l’intrada en foncion de Donald Trump per son segond mandat, de decrets son estats publicats qu’enebisson la reconeissença de genres non binaris e restrenhon los dreches de las personas transgenres, sustot en suprimissent la possibilitat de mençonar un genre autre que masculin o femenin suls documents oficials. Aquela politica a conduch a d’incidents ont de passatgièrs transgenres an vist lor genre incorrèctament indicat sus lors passapòrts, creant aital de risques de discriminacion pendent lors viatges. Pasmens, l’Union Estatsunidenca per las Libertats Civilas (ACLU, segon l’acronim en anglés) perseguís actualament l’administracion Trump en nom de sèt demandaires que se vegèron refusar de passapòrts per lor identitat de genre.
L’associacion LGBT+ Danemarc a exprimit de preocupacions pertocant de risques d’arrestacion a l’aeropòrt o de situacions inconfortablas pels viatjaires transgenres. Malgrat que, fins ara, cap de danés siá pas estat refusat a l’intrada als Estats Units dempuèi genièr, la prudéncia demòra, soslinhant l’impacte d’aquela politica sus la libertat de circulacion e los dreches de las personas transes.
Denmark advises transgender people to contact US Embassy before traveling to the United States https://t.co/9cdDLbHUNApic.twitter.com/Epsaabta3F
— Jerry Lacay (@JerryLacay) March 22, 2025
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari