En 2030, Coca-Cola poiriá venir lo màger polluidor de plastic al Mond, segon un rapòrt alarmant de l’ONG americana Oceana, coma o rapòrta L’Humanité. D’aicí a aquela data, la marca poiriá generar fins a 600 000 tonas de curum plastic per an, regetats dins los oceans e los corses d’aiga. Aquela estimacion s’apond a la preséncia de microplastics ja detectada dins d’elements essencials del còrs uman, tals coma la placenta, lo lach mairal e la sang. Malgrat aquela situacion critica, Coca-Cola sembla pauc dispausada a cambiar d’estrategia.

L’entrepresa anoncièt que renonciava a l’objectiu d’aumentar l’utilizacion d’embalatges reütilizables, preferissent de se concentrar sul reciclatge del plastic e sus la collècta de sas botelhas d’usatge unic. Pasmens, aquel apròchi es pas sufisent per Matt Littlejohn, vicepresident d’Oceana, que critica l’estrategia de reciclatge de la marca. Segon el, lo reciclatge pòt pas resòlver lo problèma del plastic incontrarotlable e Oceana preconiza puslèu una adopcion generalizada dels embalatges reütilizables. “Lo reciclatge pòt pas resòlver lo problèma del plastic incontrarotlable de l’entrepresa. La reütilizacion, si”, çò expliquèt Littlejohn en recordant que las botelhas en plastic d’usatge unic fabricadas amb de contengut reciclat “pòdon, tot coma aquelas fabricadas a partir de plastic verge, venir de degalhs marins e nòire a la vida oceanica”.

Lo problèma del plastic d’usatge unic demòra, ça que la, central. Las substàncias quimicas contengudas dins aqueles plastics pòdon provocar de risques sanitaris grèus, sustot lo càncer, l’infertilitat, las malautiás cardiacas e d’autras patologias. Per Oceana, la solucion residís dins l’aument de l’emplet d’embalatges reütilizables. Se Coca-Cola aumentèsse la proporcion d’embalatges reütilizables al 26,4 % d’aicí a 2030 (contra lo 10,2 % en 2023), la multinacionala poiriá revirar la tendéncia e reduire sos degalhs plastics de faiçon significativa.

Mentretant, l’ONG crida los responsables politics a prene de mesuras fermas per portar de solucions a aquel problèma mondial. L’avenidor de l’ocean e de la santat umana dependrà de las causidas fachas uèi per las entrepresas grandas, en començant per Coca-Cola.