Lo govèrn francés vòl desencalar lo debat sus l’abolicion del cambiament d’ora al sen de l’Union Europèa: l’executiu de Bayrou a decidit unilateralament que l’estat francés recobrariá son fus orari natural. “L’òra actuau que sigó impausada per l’administracion nazi dens los ans 1940 e l’Union Europèa qu’ei incapabla d’establir un hus orari après annadas de debats”, çò a declarat lo primièr ministre. En consequéncia, a comptar de l’an que ven, França establirà l’ora oficiala que dempuèi d’annadas la recomanda un comitat d’expèrts de Times Use Iniciative.

Mas la proposicion en question ten un ajustament suplementari per melhor correspondre a la realitat geografica. Aital, l’exagòn serà devesit en dos fuses oraris diferents: lo nòrd passarà a GMT 0 mentre que lo sud –per tant Occitània entièra— demorarà a GMT+1, çò es a una ora de mai que París. Los experts justifican aquela mesura per las diferéncias d’insolacion entre las doas mitats del país.

Las consequéncias seràn grandas, e se prevei una annada de transicion per permetre l’adaptacion dels oraris de transpòrt, de trabalh, d’emissions televisadas e d’informacions oficialas.

Aran demanda de passar a l’ora occitana

Lo Conselh Generau d’Aran a reagit lèu e a demandat a la Generalitat de Catalonha de se plegar al fus orari occitan. Mas la responsa de Barcelona es estada clara: la question de l’ora depend de Madrid. De son latz, Madrid remanda la responsabilitat a l’Union Europèa, qu’a pas encara pres cap de decision.

La síndica d’Aran, Maria Vergés, a doncas menaçat: “S’era ora occitana non ei adoptada en Aran, eth Conselh Generau d’Aran demanarà formaument era integracion ena region Occitània, o ben coma departament independent o ben integrada en departament dera Nauta Garona”. Lo Conselh dels ministres a Madrid a convocada una sesilha especiala per tractar lo subjècte.

De soslinhar que las Valadas demoraràn a l’ora italiana, que correspondrà amb l’ora occitana.

Catalonha Nòrd refusa l’ora occitana

D’autre caire, la presidenta conselh departamental dels Pirenèus Orientals, Hermeline Malherbe, a demandat oficialament que lo departament sèrve l’ora de París. Lo cònsol màger de Perpinhan sosten aquela demanda per tal que Catalonha Nòrd siá a una ora de diferéncia de Barcelona; per el es un bon biais de combatre “l’inquietanta menaça de reünificacion catalana”.