Una enquista realizada en 2023 per l'IFOP mòstra una degradacion inquietanta del nivèl d’informacion dels joves de 15 a 24 ans sus las questions de santat sexuala e de prevencion. A respècte de 2009, los joves son mens ben assabentats suls risques restacats a l’activitat sexuala e sus las ressorsas disponiblas per se protegir.

Segon las chifras reculhidas, lo 43% dels joves d’aquela categoria d’edat ignòran l’existéncia d’un tractament d’urgéncia après un risc d’exposicion al VIU, mentre que lo 65% sabon pas ont anar per practicar un despistatge. En mai d’aquò, lo 23% pensan que la pilula contraceptiva pòt protegir del VIU, una error qu’èra mens espandida en 2005 (un 10%).

Los comportaments riscats son tanplan significatius: lo 31% dels joves utilizan pas jamai de preservatiu. Dins aquel grop, lo 61% explican que se fisan de lor partenari, lo 42% considèran qu’un despistatge es sufisent e lo 19% jutjan que lo preservatiu es pas agradiu.

Aquestas donadas meton en question l’aplicacion de la lei francesa, que prevei tres sesilhas obligatòrias d’educacion sexuala a l’escòla. Pasmens, de tres parts dels joves doas afirman qu'an pas recebudas  aquelas sesilhas. Aquò soslinha lo ròtle essencial que pòdon jogar los parents dins l’educacion a l’ostal. Una marrida coneissença dels risques mena inevitablament a de comportaments perilhoses. L’educacion se passa pas d'efièch sonque a l’escòla e los parents an lor ròtle de jogar a l'ostal.

Una marrida coneissença mena a un compòrtament riscat.

Per mai d’entresenhas: https://www.sida-info-service.org/jeunes-et-vih-idees-recues-fausses-informations/