Aqueste dissabte 5 d’abril, l’estadi de Narbona reçauprà doas finalas de Copas tretzistas: la Copa Nitard dels U19 opausarà Tolosa e lo XIII Catalan; la finala de la Copa Lòrd Derby se jogarà entre Albi e Sant Estève/XIII Catalan. Es tanben a Narbona a la fin de mai que se debanarà la finala del Super-XIII.

Super-XIII: Albi e Carcassona fan pas dins la mièja mesura

Pel compte de la 19a jornada de Super-XIII, dissabte, Limós anava levar las darrièras illusions de qualificacion a Lesinhan: 20-14. Albi anava ganhar aisidament a Tolosa: 60-18. Dimenge, Pià èra mai fòrt que Vilanòva: 22-10; Vilafranca demòra en corsa per la qualificacion amb una victòria 48-18 fàcia a Avinhon. Carcassona òpta per un jòc ofensiu e empòrta la partida fàcia als Dragonets: 32-12.

Superliga: un tombat fa tombar los Dragons

En Superliga, davant 10 000 espectators a Brutus, Dragons e St Helens disputèron una partida solida. Dins las darrièras minutas, mercé a dos tombats, los angleses signèron lor victòria: 14-13.

Dijòus, Hull FC èra anat ganhar a Castleford: 24-14. Divendres, Wakefield s’impausava a Leigh: 40-14, alara que Warrington preniá lo pas sus Leeds 16-14. Festenal de punts dimenge amb las victòrias d’Hull KR a Huddersfield: 50-4, e de Wigan fàcia a Salford: 54-0 .

Es justament Salford que serà a Perpinhan divendres de ser per jogar lo quart de finala de la Cup. Los autres tres quarts prepausaràn un dèrbi entre las doas formacions d’Hull, las retrobalhas entre Wakefield e Leigh e un solid Warrington/St Helens.

En Championship, Tolosa torna batut de Doncaster 6-10.

NRL: los Dògols en cap de fila

En signant una quatrena victòria de tira del costat de Cronulla 20-6, los Dògols ocupan la primièra plaça del classament de l’NRL, una posicion qu’avián pas coneguda dempuèi plan de temps. Novèla desfaita del campion Penrith cò dels Lapinons: 18-28. Los Titans son mai fòrts que los Polets 30-12. Novèla desfaita pels Dalfins que recebián los Bròncos 12-30.Los Vaquièrs baton Canberra: 30-20, e Manly bat Parramatta: 26-12. Partida indecisa entre los Tigres e los neozelandeses que, fin finala, ganhan: 26-24.